ابو ظہبی : پاکستان سپر لیگ کے 24 ویں میچ میں کراچی کنگز نے ملتان سلطانز کو پانچ وکٹوں سے شکست دے دی ہے۔کراچی کنگز نے 119 رنز کا ہدف 20 ویں اوور میں پانچ وکٹوں کے نقصان پر حاصل کر لیا۔11 رنز بنانے کے بعد کولن منرو محمد الیاس کی گیند پر انھی کے ہاتھوں کیچ آؤٹ ہو گئے۔ اسی طرح محمد الیاس نے اپنی دوسری وکٹ بھی لی جب انھوں نے بابر اعظم کو 12 رنز کے سکور پر ایل بی ڈبلیو آؤٹ کر دیا۔پی ایس ایل فور میں سب سے زیادہ سکور کرنے والے کولن انگرم کو 24 گیندوں پر 31 رنز بنانے کے بعد محمد عباس کی گیند پر بولڈ ہو گئے۔ اسی اوور میں محمد عباس نے افتخار احمد کو بھی کوئی رن بنائے بغیر وکٹ کیپر عمر صدیق کے ہاتھوں کیچ آؤٹ کروا دیا۔اس سے قبل کراچی کنگز نے ٹاس جیت کر ملتان سلطانز کو پہلے بیٹنگ کی دعوت دی تھی اور مقررہ 20 اوورز کے اختتام پر ملتان سلطانز نے سات وکٹوں کے نقصان پر 118 رنز بنائے تھے۔کراچی کنگز کی شاندار بولنگ کی بدولت ملتان سلطانز کا کوئی بھی بلے باز بڑی اننگز کھیلنے میں ناکام رہا۔حماد اعظم 30 گیندوں پر دو چوکوں کی مدد سے 29 رنز بنا کر ملتان سلطانز کی جانب سے ٹاپ سکورر رہے۔ملتان سلطانز کے پہلے آؤٹ ہونے والے بلے باز عمر صدیق تھے جو دوسرے ہی اوور میں پانچ رنز بنا کر عثمان شنواری کی گیند پر بولڈ ہوئے۔شنواری نے اپنے اگلے ہی اوور میں جونسن چارلز کا شکار کیا۔ چارلز سات رنز بنا پائے۔ 44 کے مجموعی سکور پر جیمز ونس 16 رنز بنا کر آؤٹ ہوئے۔14 ویں اوور میں عمر خان نے کپتان شعیب ملک کو 26 اور ڈینیل کرسچیئن کو پانچ رنز پر آؤٹ کیا۔ ملتان سلطانز کی جانب سے 15 رنز کے عوض چار بلے بازوں کو آؤٹ کر کے عثمان شنواری نمایاں بلے باز رہے جبکہ عمر خان نے تین کھلاڑیوں کو آؤٹ کیا۔پی ایس ایل کے چوتھے ایڈیشن میں باقی ٹیموں کی نسبت ملتان سلطانز کی کارکردگی کچھ اچھی نظر نہیں آتی۔موجودہ ایڈیشن میں ملتان سلطانز آٹھ میچ کھیل چکی ہے اور اس میں سے چھ میچ ہارنے کے بعد یہ چار پوائنٹس کے ساتھ پوائنٹس ٹیبل پر سب سے نچلے درجے پر ہے۔چھ پوائنٹس کے ساتھ کراچی کنگز پوائنٹس ٹیبل پر پانچویں نمبر پر ہے۔ کنگز نے اب تک سات میچ کھیلے ہیں جن میں یہ تین میں کامیاب جبکہ چار میں ناکام رہی ہے۔
فیس بک کمینٹ