ملتان ۔۔ گروپیش نیوز ۔۔پنجاب اور خیبر پختونخوا میں بارشوں سے 4 افراد ہلاک جبکہ 27 زخمی ہوگئے ہیں۔ریسکیو پنجاب کے ترجمان فاروق احمد کا کہنا ہے کہ اوکاڑہ میں بستی ریاض آباد میں چھت گرنے سے پانچ سالہ بچی ہلاک جبکہ خانیوال میں آسمانی بجلی گرنے سے ایک شخص ہلاک ہوا ہے۔بہاولنگر میں چھت گرنے سے ایک شخص کی ہلاکت کی اطلاع ہے جبکہ جہلم میں ایک شخص برساتی نالہ میں ڈوب گیا۔
ملتان میں سب سے زیادہ بارش کڑی جمنداں ڈسپوزل اسٹیشن پر 61ملی میٹر ریکارڈ کی گئی ہے ، چونگی نمبر 9 ڈسپوزل اسٹیشن پر 51 جبکہ پرانا شجاع آباد روڈ ڈسپوزل اسٹیشن پر 23 ملی میٹر بارش ریکارڈ کی گئی ۔
پاکستان میں آفات سے نمٹنے کے قومی ادارے این ڈی ایم اے نے گلیشیائی جھیل کے پھٹنے (GLOF) کا انتباہ جاری کرتے ہوئے کہا کہ اس سے کئی علاقوں میں سیلاب آ سکتے ہیں جبکہ ملک کے صوبہ پنجاب میں بارشوں سے دو بچوں سمیت 4 افراد کی جان گئی ہے۔بیان کے مطابق مون سون بارشوں کے باعث 13 مخدوش و کچے مکانات متاثر ہوئے۔
اس سے قبل، محکمہ موسمیات نے الرٹ جاری کرتے ہوئے کہا تھا کہ موسلا دھار بارشوں کے باعث مری، گلیات، مانسہرہ، کوہستان، دیر، سوات، شانگلہ، نوشہرہ، صوابی، اسلام آباد، راولپنڈی، ڈی جی خان، شمال مشرقی پنجاب اور کشمیر میں ندی نالوں میں طغیانی کا خدشہ ہے۔محمکہ موسمیات کا کہنا تھا کہ شدید بارشوں کے باعث اسلام آباد، راولپنڈی، گوجرانوالہ، لاہور، سیالکوٹ، سرگودھا، فیصل آباد، نوشہرہ،چارسدہ اور پشاور کے نشیبی علا قے زیر آب آنے کا بھی اندیشہ ہے۔
محکمہ موسمیات کے مطابق بلوچستان کے وسطی اور مشرقی حصوں، خصوصاً کوہ سلیمان رینج سمیت مختلف علاقوں میں پری مون سون سیزن کی بارشیں شروع ہو چکی ہیں۔
محکمہ نے پیشن گوئی کی ہے کہ بارشوں کا یہ سلسلہ 29 جون تک وقفے وقفے سے جاری رہے گا۔
فیس بک کمینٹ