ما تہانوں کے دساں جے نکے ہوندیاں ابا جی دے نال تُردے ہوئے محلے وچ مینوں کنی عزت ملنی ہئی۔ پر ابا جی دا بازو تے مان تاں انہاں دا وڈا بھرا یعنی میرا تایا بزرگوار ہئی دوویں بھرا جدوں کٹھے تردے سن تے اینج لگدا سی دو شیں (شیر) پئے آندے نیں، اک واری مال روڈ تے مینوں سیر کراندے دوویں شیں چڑیا گھر لے گئے تے اوتھے عملے دے لوکی گھابر گئے جے شیں تے آپ مجاز اتھارٹی ہوندا اے اوہنوں جانوراں نوں ویکھن دا ٹکٹ کیویں دِتا جاوے ؟
میرے تایا ہوری وی اُچے لمے تے گبرو جوان سی تے واج اینی کڑک دار سی جے محلے وچ کسی نوں بُلاندے تے اینچ لگدا لاؤڈ سپیکر وچ بوہتا کرنٹ آ گیا اے، سویر ہوندی تے مینوں واج دے کے گھروں بلاندے تے سردائی گھوٹن دے کم تے لا دیندے۔ تے میں تایا جی ہوراں ول ای لسی دے دو تِن گلاس پی کے سوں جاندا سی، انہاں دے ویہڑے وچ ای اکھاڑا بنیا ہویا سی تے جدوں کلغی پہلوان آندا سی تے مینوں وی کثرت لئی بلا لیندے سی، میں تہانوں کی دساں میرے تایا جی کنے گبرو پھلوان سی، گلی دی نکر تے ای انہاں دی نہاری، بریانی، قورمے دی وڈی دکان سی۔ لوکی قطاراں وچ کھلوتے ہوندے سن تے محلے وچ چارو پاسے دیگاں ہی دیگاں، جنہاں وچوں کڑچھے نال کھرچن کڈن دی واج دی یاد نال ای تاں مینوں شاعری دی تحریک ملدی اے، میں نکے ہوندیاں تو ای ”گبرو پت لہندے پنجاب دا لگدا سی“ تے جدوں کجھ وڈا ہویا تے سکول جاندے ہوئے بک سٹالاں توں رسالے تے کہانیاں دیاں کتاباں خرید کے پڑھن لگ پیا۔
محلے تے برادری دے کئی لوکی کجھ حیران تے کجھ پریشان ہو گئے جے کلغی پہلوان دا اک قابل پٹھا اندروں نرا باؤ نکلیا اے، اوس ویلے سمے کوئی کمپیوٹر، انڈرائیڈ تے ہوندے نئیں سی، بے جی دیاں ملن والیاں کدی ڈاک لے کے آجاندیاں تے مینوں بُلا کے پَتر پڑھن لئی آکھیا جاندا سی، ایہ پَتر پڑھدے پڑھدے عمر لنگدی گئی تے میں جوابی پتر لکھدے لکھدے جوان ہویا تے ممتاز ادیب بن گیا۔ میرے تایا جی دیاں دیگاں دی شہرت میرے ہوش سنبھالن توں پہلاں ای ادبی تے علمی سنگتاں تائیں اپڑ گئی سی، جیہڑا شاعر وی اک واری تایا جی دی بریانی کھا لیندا سی اوہنوں نانی یاد آجاندی سی، تے نانا بُل جاندا سی، انہاں دے نال وڈے ناواں والے تے جیدّ کن ٹُٹے وی میرے تایا بزرگوار دے مرید سن، وڈے تے نامی گرامی لوکاں نوں جدوں ابا جی مینوں نال لے کے ملن جاندے سن تے تایا جی دی دیگ پہلاں ای اپڑ جاندی سی، فیر جدوں میرا ویاہ ہویا تے رشتے داراں تے محلے والیاں نے رل مل کے مینوں سہرا بن کے گھوڑے تے بِٹھا دتا سی، تایا جی دے نکے پت دے نال اک دیگڑے نوں وی میرا سربالا بنایا گیا سی۔
میں شیروانی پائی ہوئی سی تے واجے والیاں نوں تایا جی نے اینیاں ویلاں دتیاں جے وہ آپو آپ ای ”دیساں دا راجہ’‘، چھڈ کے ”دیگاں دا لاڑا“ گان لگ پئے سن۔ میرے مکھ تے اینا نور سی جے ہر پاسوں بلے بلے دی واج سنائی دیندی پئی سی تے میں تریفاں سن کے اپنے آپ نوں اک قومی پردھان، سفیر یا وزیر سمجھن لگ پیا۔۔۔۔
اے تایا جی دی مجلس حلیم، بریانی دی برکت نال ای تاں میری شخصیت وچ نکھار تے مکھ تے نور وکھائی پیندا پیا سی۔ اوہ چنگا سماں سی وڈیاں نوں عزت دتی جاندی سی، میرے والد ماجد جنہاں نوں میں مشاعریاں دی صدارت کرن والیاں دی پیروی وچ ”والد گرامی قدر“ آکھن لگ پیا سی دے تایا جی نال ٹردے تے دو قسم پچھاں رہندے سن، میرے ہوش سنبھالن توں پہلاں ای تایا جی اپنا کاروبار یورپ دے مُلکاں تائیں لے گئے سن، تے امریکہ دے شہر نیو یارک وچ انہاں دی حلیم نے بزنس دے سارے ریکارڈ توڑ دتے سن۔ ابا جی نال مشورہ کر کے تایا جی نے مینوں بریانی تے حلیم دیاں دیگاں دا ڈائریکٹر جنرل بنا کے امریکہ ٹور دتا۔ اوتھے اپڑیا تے ملک دے مہان لوک مینوں جی آیاں نوں آکھن لئی ایئر پورٹ تے موجود سن، میں جدوں جہاز تو لتھا تے شیروانی میرے ڈھڈ تے لش لش کردی پئی سی، میں ایمرجنسی لئی بریف کیس وچ دھوتی وی رکھی ہوئی سی۔ خیر میرے ایتھاں اپڑن دا ایہ مقصد وی سی جے قومی ترقی وچ دیگاں دی اہمیت تے چانن پاواں۔۔۔۔
مینوں دیگاں نال نکے ہوندیاں تو بڑا پریم سی، دیگاں گلی دی نکر تے پیاں ہوندیاں سی تے میں اُنہاں نوں ہلا ہلا کے سائنسی تجربے کردا رہندا سی۔ تے چھٹی والے دن تایا جی دے کارکناں دے آن تو پہلاں دیگاں وچ پانی بھر کے غوطے لاندا رہندا سی، پر ہن غیر دھرتی تے دیگاں دی سلامتی دا سوال سامنے سی، تایا جی دے جانن والے غیر ملکیاں نوں لے کے آندے تے انہاں نوں دو طرفہ تعلقات تے چانن پاندے ہوئے قورمے، حلیم، بریانی تے شب دیگ دی فضیلت وی بیان کردا۔ مہماناں تے غنودگی طاری ہو جاندی تے میں انہاں نوں دسدا ایہو ساڈا فلسفہ حیات اے، میں جان جوکھاں وچ پا کے کئی غیر ملکی کمپنیاں نوں ملک اچ دیگ تے دیگڑا سازی دے کارخانے لان لئی منا لیا۔ تایا جی نوں فون تے اے خبر دتی تے اینے خوش ہوئے جے چھال مار کے اک نائی (کاریگر) نوں جپھا پا لیا تے او غریب تایا جی دے رعب تے آکسیجن دی کمی نال بے ہوش ہو گیا۔ میں تایا جی نو دسیا سے ساری کائنات ای اک دیگ وانگ اے۔ تے جے اساں دیگاں دے کارخانے لا لئے تے آپو آپ خوشحالی آئے گی تے قرضے وی آپو آپ لتھ جان گے۔ پر اک دن ابا جی نے نیٹ تے وڈیو وکھائی۔ گلی دی نکڑ تے تایا جی نے اپڑیں اک دیگ نوں جپھا پایا ہوایا سی تے زار و قطار روندے جاندے سن۔
فیس بک کمینٹ