ملتان:سینئرسیاسی رہنماءاور سابق رکن قومی اسمبلی راناشوکت حیات نون ہفتے کے روزطویل علالت کے بعد شجاع آباد میں ا نتقال کرگئے۔ان کی عمر 80برس تھی۔رانا شوکت حیات نون نے شجاع آباد اور ملتان کی سیاست میں اہم کردارادا کیا۔ان کے والد راناشفیع نون بھی سیاست میں بہت سرگرم تھے۔رانا شوکت نون 24مئی 1942ءکو شجاع آباد میں پیدا ہوئے۔ ابتدائی تعلیم شجاع آ باد سے حاصل کی اور گورنمنٹ پائلٹ ہائی سکول ملتان سے میٹرک کیا۔بعدازاں وہ ایمرسن کالج اور ولایت حسین اسلامیہ کالج میں زیرتعلیم رہے۔ایف اے کے بعد زراعت سے وابستہ ہوگئے۔
رانا شوکت حیات نون نے اپنے سیاسی کیریئر کاآغاز مقامی سیاست سے کیا۔ 1985 ء کے غیرجماعتی انتخابات میں وہ رانا تاج نون کوشکست دے کر رکن قومی اسمبلی منتخب ہوئے۔محمد خان جونیجودور میں انہوں نے نئی روشنی سکیم کے تحت حلقے میں 100پرائمری سکول قائم کیے۔انہوں نے ضلع کونسل ملتان کی سیاست میں بھی اہم کردارادا کیا۔انہوں نے اپنے بیٹے رانا اعجاز نون اور بھانجے رانا قاسم نون کو بھی سیاست میں متعارف کروایا۔رانا شوکت نون کے بیٹے رانا شہزاد نون ضلع کونسل ملتان کے وائس چیئرمین بھی رہے۔
فیس بک کمینٹ