نیو یارک : امریکہ کے شمال مشرقی ریاستوں میں طوفان آئیڈا کے باعث کم سے کم 41 افراد کی ہلاکت کی تصدیق ہو چکی ہے۔ریاست نیو جرسی کے گورنر نے بتایا ہے کہ ہلاک ہونے والوں میں 41 افراد میں سے 23 کا تعلق نیوجرسی سے ہے اور ان میں سے اکثر کی اموات پانی کا درجہ بڑھنے کے دوران گاڑیوں میں پھنسے رہ جانے کے باعث ہوئیں۔
نیویارک میں اب تک 14 افراد کی ہلاکت کی تصدیق ہوئی ہے جن میں سے 11 کی موت اپنے اپارٹمنٹس کے تہہ خانوں میں پھنسنے کے باعث ہوئی۔ اس کے علاوہ فلاڈیلفیا اور پینسلوینیا میں تین جبکہ کنیکٹیکٹ میں ایک ہلاکت کی تصدیق ہوئی ہے۔امریکی صدر جو بائیڈن کا کہنا ہے کہ وہ اتوار کے روز ریاست لوایزیانا کا دورہ بھی کریں گے اور انھوں نے طوفان آئیڈا کا ذمہ دار ماحولیاتی تبدیلی اور عالمی طور پر درجہ حرارت میں اضافے کو قرار دیا ہے۔ انھوں نے مزید کہا ہے کہ ماحولیاتی بحران سے نکلنے کے لیے تاریخی سرمایہ کاری کی ضرورت ہے۔امریکہ کو گذشتہ کئی برسوں سے ماحولیاتی تباہ کاریوں کا سامنا ہے اور امریکی صدر کے مطابق اب یہ زندگی موت کا معاملہ‘ بن چکا ہے۔
گذشتہ روز نیو یارک کے مشہور سنٹرل پارک میں صرف ایک گھنٹے کے دوران آٹھ سینٹی میٹر بارش ریکارڈ کی گئی تھی۔ شہر کی تمام سب وے لائنز بند ہیں اور ریسکیو عملے کی گاڑیوں کے علاوہ تمام ٹریفک کو سڑک پر آنے سے منع کر دیا گیا تھا۔نیو یارک اور نیو جرسی میں قومی موسمیاتی سروس کے مطابق ہنگامی حالت نافذ ہے۔نیو یارک اور نیو جرسی سے آنے جانے والی پروازیں بھی متاثر ہوئی ہیں۔ساتھ ہی نیویارک میں جاری یو ایس اوپن کے میچز کو بھی اس وقت روکا گیا جب سٹیڈیم کی چھت سے پانی اندر آنے لگا۔نیویارک میں محکمہِ موسمیات نے مزید شدید بارش کا انتباہ جاری کیا ہے اور لوگوں سے کہا ہے کہ وہ گھروں سے باہر نہ نکلیں۔نیویارک ٹائمز کے مطابق ریاست ڈیلاویئر، نیو جرسی اور پنسلوینا میں ٹورانیڈو واچ جاری کر دیا گیا ہے جبکہ ریاست ورجنیا اور ویسٹ ورجنیا میں گورنروں نے ہنگامی صورتحال کا اعلان کر دیا ہے۔منگل کے روز میکسار نامی کمپنی کی جانب سے جاری کردہ سیٹلائٹ تصاویر میں ملک کے جنوبی خلیجی ساحل میں شدید تباہی دیکھی جا سکتی ہے۔
طوفان آئیڈا امریکہ کے مرکزی علاقوں تک آنے والا تاریخ کا پانچواں شدید ترین سمندری طوفان ہے۔
( بشکریہ : بی بی سی اردو )
فیس بک کمینٹ