نیو یارک : متنازع برطانوی مصنف سلمان رشدی کی حالت اب پہلے سے بہتر ہے، اسے وینٹی لیٹر سے اتار لیا گیا ہے اور وہ دوبارہ بات کرنے کے قابل ہے۔
اس سے قبل سلمان رشدی کے ایجنٹ کا کہنا تھا کہ اس کی صحت کے متعلق خبریں اچھی نہیں ہیں اور اس کی حالت تشویشناک ہے۔ وہ وینٹی لیٹر پر ہے، بول نہیں پا رہا اور اس کی ایک آنکھ ضائع ہو جانے کا امکان ہے۔‘
اس کے ایجنٹ اینڈریو وائلی نے ایک بیان میں کہا کہ ’مصنف سلمان رشدی پر سٹیج پر تقریب کے دوران حملہ کیا گیا، وہ ممکنہ طور پر ایک آنکھ سے محروم ہو جائیں گے، ان کے بازو کے اعصاب کٹے ہوئے تھے اور ان کے جگر میں چھرا گھونپ کر نقصان پہنچایا گیا تھا۔‘سلمان رشدی پر قاتلانہ حملہ کرنے کے الزام میں امریکی پولیس نے ایک شخص کو گرفتار کیا ہے۔
یاد رہے گذشتہ روز سلمان رشدی پر امریکی ریاست نیویارک میں ایک تقریب کے دوران چاقو سے حملہ کیا گیا اور اس کی گردن اور پیٹ پر وار کیے گئے۔
پولیس نے سلمان رشدی پر حملے کے بعد نیو جرسی کے علاقے فیئر ویؤ سے تعلق رکھنے والے ہادی مطر نامی ایک 24 سالہ مشتبہ شخص کو گرفتار کر لیا ہے۔ نیو یارک کے حکام کا کہنا ہے کہ ہادی مطر نے جرم سے انکار کیا مگر وہ ریمانڈ پر پولیس کی حراست میں ہیں۔ ڈسٹرکٹ اٹرنی جیسن شمڈ کا کہنا ہے کہ ’یہ اس کیس کے ابتدائی مراحل ہیں جس میں طویل قانونی طریقہ کار اختیار ہوگا۔‘
برطانوی مصنف سلمان رشدی پر امریکہ کی ریاست نیو یارک میں سٹیج پر حملہ کیا گیا۔ تاہم پولیس کی طرف سے ابھی تک اس حملے کے بارے میں کسی مقصد یا الزامات کی تصدیق نہیں کی گئی ہے اور وہ جائے وقوع سے ملنے ایک بیگ اور الیکٹرانک آلات کی جانچ کے لیے سرچ وارنٹ حاصل کرنے کی کوشش کر رہی ہے۔
سلمان رشدی کو گذشتہ کئی برسوں کے دوران دھمکیاں ملتی رہی ہیں جبکہ 1989 میں ایران کے رہبرِ اعلیٰ نے ایک فتویٰ جاری کیا تھا جس میں سلمان رشدی کی موت کا مطالبہ کیا گیا تھا۔
ابتدائی تفصیلات کے مطابق جب ان پر حملہ ہوا اس وقت سلمان رشدی شیتوقوا انسٹیٹیوٹ میں ہونے والی ایک تقریب میں خطاب کر رہے تھے۔
عینی شاہدین نے دیکھا کہ اسی اثنا میں ایک شخص سٹیج کی جانب دوڑا اور اس نے سلمان رشدی کو مکا رسید کیا یا چاقو سے حملہ کیا۔ اس واقعے کے فوراً بعد تقریب میں موجود افراد سٹیج کی طرف دوڑے۔ان کے مطابق وہاں موجود افراد نے حملہ آور پر قابو پا لیا اور پولیس نے اسے حراست میں لے لیا۔
نیو یارک پولیس کے مطابق اس حملے میں سلمان رشدی کی گردن اور پیٹ میں کم از کم ایک ایک بار چھرا گھونپا گیا، جس کے بعد ان کو پیلی کاپٹر کے ذریعے مقامی ہسپتال منتقل کر دیا گیا۔اس حملے کو روکنے کی کوشش کرنے والے ہینری ریس کو بھی سر پر معمولی چوٹ آئی ہے۔ ان کے ادارے نے ہی اس تقریب کا اہتمام کیا تھا۔
( بشکریہ : بی بی سی اردو )
فیس بک کمینٹ