ہر ذمہ دار قوم کے لیڈروں کو یہ باور کرنا ہوتا ہے کہ بعض اہم معاملات پر وسیع تر اتفاق رائے کی ضرورت ہوتی ہے۔ اگر قومی اہمیت کے کسی مسئلہ پر کوئی اصولی اختلاف موجود بھی ہو تو قومی تعمیر میں دلچسپی رکھنے والے لیڈر ان موضوعات پر پبلک بیان دینے یا سیاست کرنے سے گریز کرتے ہیں۔
حکومت اپنے طور پر اپوزیشن کی رائے جاننے کی کوشش کرتی ہے اور اپوزیشن اگر کسی مسئلہ پر بعض ایسے پہلوؤں کی نشاندہی کرنا چاہے جن پر اس کے خیال قوم و ملک کودرپیش کوئی خاص مسئلہ حل کرنے میں غور و فکر کرنا چاہئے تو وہ مناسب سیاسی ذرائع سے ایسے دلائل برسر اقتدار گروہوں تک پہنچاتی ہے۔ دیکھا جاسکتا ہے کہ پاکستان میں اس حوالے سے باوا آدم ہی نرالا ہے۔ اس سے بڑی بدقسمتی کی کوئی بات نہیں ہوسکتی کہ ہر سیاسی لیڈر خود کو عقل کل ہی نہیں بلکہ قومی مفاد کا سب سے بڑا چیمپئن بھی سمجھنے لگے اور دوسری سیاسی قوتوں کو مسترد کرتے ہوئے یہ ظاہر کرنے کی کوشش کرے یہ سب لوگ ملک دشمن یا غدار ہیں۔
ایسی نعرے بازی سے کسی ایک لیڈر کے سخت گیر حامیوں کو تو بے وقوف بنایا جاسکتا ہے لیکن عوام کی بڑی اکثریت کو گمراہ کرنا ممکن نہیں ہے۔ یہ تسلیم کیا جاسکتا ہے کہ پاکستانی عوام گوناں گوں مسائل کا شکار ہیں، ان کے ہاں تعلیمی سطح کم ہے اور سیاسی شعور کو متعدد تعصبات کی وجہ سے گہنا دیاگیا ہے۔ لیکن اس کے باوجود اہل پاکستان، قومی مسائل، ریجنل تعلقات اور عالمی سطح پر رونما ہونے والی تبدیلیوں کے بارے میں کسی حد تک آگاہ رہتے ہیں اور ان کے بارے میں اپنی رائے بھی ضرور بناتے ہیں۔ یہ رائے کسی ایک خاص پارٹی یا لیڈر کی حمایت سے عبارت نہیں ہوتی بلکہ اس میں بنیادی طور سے قومی ضرورتوں کو پیش نظر ہوتی ہیں۔
پوچھا جاسکتا ہے کہ اگر پاکستانی عوام سیاسی طور سے اس حد تک باشعور ہیں کہ وہ ملکی صورت حال کا عالمی تناظر میں جائزہ لینے اور اس پر رائے قائم کرنے کی صلاحیت رکھتے ہیں تو وہ ایسے لیڈروں کے پیچھے کیوں لگے ہوئے ہیں جنہوں نے قومی مسائل کو حل کرنے کی بجائے ابھی تک ان میں اضافہ ہی کیا ہے۔ یہ ایک جائز سوال ہے لیکن اس کا جواب بھی اتنا ہی سادہ اور عام فہم ہونا چاہئے۔ پاکستانی عوام کا شعور اس لئے قومی مسائل حل کرنے میں معاون ثابت نہیں ہوپایا کہ ملک میں جمہوری طریقے کو کام کرنے کا موقع ہی نہیں دیاگیا۔ پاکستان کے قیام کے بعد اور پھر 1971 میں ملک دو لخت ہوجانے کے بعد مغربی پاکستان کے ’پاکستان ‘ بن جانے تک میں ملکی تاریخ کے دونوں ادوار پر غور کیا جائے تو یہ حالات کی تصویر واضح ہوجاتی ہے۔ یا تو عوام کو اپنی مرضی کے نمائیندے اسمبلیوںمیں بھیجنے کا موقع ہی نہیں دیا گیا یا پھر بار بار فوجی مداخلت کے ذریعے بنیادی آزادیوں پر ہی نہیں عوامی شعور کے احترام و تقدس پر بھی ڈاکہ ڈالا گیا۔ اس سے مایوسی کی فضا پیدا ہونا بالکل فطری امر ہے۔
ماضی قریب کی سیاسی صورت حال کا جائیزہ لیتے ہوئے اگر1999 کے مارشل لا اور اس کے بعد قائم ہونے والی تمام جمہوری اور غیر جمہوری حکومتوں کا جائزہ لیا جائے تو یہ حقیقت مزید نکھرکر سامنے آجاتی ہے کہ پالیسی سازی تو بہہت دور کی بات ہے، پاکستانی عوام کو اپنے نمائیندے چننے کا حق دینے سے بھی گریز کیاجاتا رہا ہے۔ ملک میں بظاہر جمہوری نظام کام کرتا رہا ہے اور ایک متفقہ آئین بھی قوم کی رہنمائی کے لئے موجود رہا ہے ۔ اس کے باوجود فوجی اسٹبلشمنٹ سے لے کر عدالتی فیصلوں تک نے اس جمہوری عمل کو عوام کی رائے کے مطابق کام کرنے کے کا موقع نہیں دیا۔ کبھی قومی مفاد کے نام پر سیاسی لیڈروں کو گمراہ کن حکمت عملی اختیار کرنے پر مجبور کیاجاتا ہے۔ اور کبھی عدالتی فیصلے آئین کی یوں تشریح و توضیح کرتے رہے ہیں کہ ووٹ دینے سے لے کر اسمبلیاں قائم ہونے اور وہاں فیصلہ سازی کا سارا عمل اگر براہ راست جی ایچ کیو کے پاس گروی نہیں تھا تو عدالتی فیصلوں کے نام پر پارلیمنٹ کو غیر ضروری ’ادارہ‘ بنادیا گیا۔
حالانکہ ملکی آئین اور یہاں پر مروجہ پارلیمانی جمہوری نظام اس وقت تک نتائج دینے میں ناکام رہے گا جب تک پارلیمنٹ کو ہی حقیقی خود مختار ادارہ نہ بنایا جائے اور سارے اہم فیصلے اسی فورم پر نہ کئے جائیں۔ سیاست دانوں پر تو یہ الزام عائد کیا جاتا رہاہے کہ وہ پارلیمنٹ کا احترام نہیں کرتے لیکن عملی طور سے ملک کے طاقت اداروں نے بھی یہی طرز عمل اختیار کیا ہے۔ اس کے نتیجے میں اقتدار و اختیار کی بندر بانٹ کا ایسا سلسلہ شروع کیا گیا کہ سیاست دانوں نے بھی اس کا حصہ بننے میں ہی عافیت سمجھی تاکہ وہ بھی اختیارات کی تقسیم اور اس کے نتیجہ میں ملنے والے مفادات میں کسی حد تک حصہ دار بنے رہیں۔ یہی وجہ ہے کہ ملک میں سیاست قومی مسائل پر بات کرنے اور ان کے حل تلاش کرنے کی بجائے ، اقتدار حاصل کرنے اور مفادات کے حصول کا ذریعہ بن چکی ہے۔
کسی تفصیل میں جائے بغیر یہ عرض کیا جاسکتا ہے کہ ماضی قریب میں فوج کی براہ راست مداخلت سے ملک میں ایک خاص طرح کا جو نظام مسلط کرنے کی کوشش کی گئی اور اسے کامیاب بنانے کے لئے جیسے ایک خاص لیڈر کو مسیحا بنا کر پیش کیا گیا، اس کے بعد اب ملک میں جمہوریت ہی کمزور نہیں ہوئی بلکہ تمام قابل ذکر ادارے بھی بے توقیر ہوئے ہیں۔ اب اس حوالے سے جس بھی طرف سے جو بھی معلومات فراہم ہورہی ہیں ، ان سے اسی تاثر کو تقویت ملتی ہے کہ یہ ایک ایسا حمام ہے جس میں سب برہنہ ہیں اور اب اپنے اپنے طور پر دوسرے کی عریانی کو عام کرکے اپنی نیک نامی ثابت کرنے کی کوشش کی جارہی ہے۔ تاہم پاکستانی عوام معاملات کی جو تصویر بنانے کی کوشش کرتے ہیں اس میں انہیں تمام بڑے بڑے نام اور نامی ادارے پست قد اور سازشوں کے مراکز دکھائی دینے لگے ہیں۔
ان اداروں میں صرف فوج کو مطعون کردینا ہی کافی نہیں ہوگا ۔ اگرچہ قومی معاملات میں طویل المدت غیر آئینی و غیر قانونی مداخلت کی وجہ سے صورت حال کا زیادہ بوجھ فوج ہی کو برداشت کرنا پڑا ہے۔ البتہ اعلیٰ عدلیہ اور سیاسی پارٹیاں بھی اس آلودگی سے اپنا دامن بچانے میں کامیاب نہیں ہوئیں۔ یہ تو کہا جاتا ہے کہ ملک میں سنگین سیاسی بحران ہے اور عدم ااعتبار کی افسوسناک صورت حال موجود ہے لیکن اسے پیدا کرنے والے ابھی تک محض دوسروں پر انگشت نمائی کرکے اپنی غلطیوں کو جائز قرار دینے کی کوشش کرتے ہیں۔ درحقیقت یہی اس وقت پاکستانی قوم کا سب سے بڑا مسئلہ ہے۔
ملک کو بعض اہم مشکلات کا سامنا ہے۔ ایک معیشت، دوئم امن و مان کی صورت حال اور دہشت گردی کا بڑھتا ہؤا خطرہ اور سوئم ہوشربا مہنگائی اور اس کی وجہ سے عوام میں بڑھتی ہوئی بے چینی کی صورت حال۔ سب اداروں اور لیڈروں کو معلوم ہونا چاہئے کہ یہ مسائل نہ تو کسی ایک شخص کے پید اکردہ ہیں اور نہ ہی کوئی ایک ادارہ، پارٹی یا لیڈر انہیں حل کرنے میں کامیاب ہوسکتا ہے۔ اگر پاکستانی لیڈر ایک ذمہ دار قوم کے طور پر فرض شناسی کا مظاہرہ کرتے تو وہ ان مسائل کو ایک د وسرے کو نیچا دکھانے کے لئے ہتھکنڈا بنانے کی بجائے مل جل کر اس مشکل سے نکلنے کا راستہ تلاش کرنے کی کوشش کرتے۔ فوج کو دوٹوک الفاظ میں پیغام دیاجاتا کہ آپ نے کئی وزیر اعظموں کو کٹھ پتلی بنا کر دیکھ لیا۔ اب آپ منتخب حکومت کے احکامات کی پابندی کریں۔ عدلیہ کی بے لگام ’خود مختاری‘ کو قانون کی لگام پہنانے کے لئے پارلیمنٹ میں اشتراک عمل سے مناسب قانون سازی کی جائے۔ غیر منتخب ادارے اسی وقت منہ زور ہوتے ہیں جب منتخب عناصر اصولوں پر اتفاق کرنے کی بجائے شخصیت پرستی کی بنیاد پر دشمنیاں پالتے ہیں اور ان کا پرچار کرکے اپنے حامیوں کو آپس میں لڑنے پر آمادہ کرتے ہیں۔ آج پنجاب اسمبلی کے مناظر نے اس کی درست تصویر پیش کی ہے۔
شہباز شریف، آصف زرداری اور عمران خان سمیت سب قومی لیڈروں کو کم از کم اتنا سیاسی شعور ضرور ہونا چاہئے کہ اس سال کے دوران منعقد ہونے والے انتخابات میں واضح اکثریت کا تصور خواب و خیال بن کر رہ جائے گا۔ اب ملک میں دو کی بجائے تین بڑی سیاسی قوتیں ہیں اور ان تینوں پارٹیوں کی قابل ذکر حمایت موجود ہے۔ ان حالات میں قومی اسمبلی ہی نہیں بلکہ بیشتر صوبائی اسمبلیاں بھی نام نہاد ’معلق‘ اسمبلیاں ہوں گی۔ یعنی کسی ایک پارٹی کو اکثریت حاصل نہیں ہوگی بلکہ ہر پارٹی کو کچھ نہ کچھ حصہ ملے گا۔ اس لئے اب لیڈروں کو دوتہائی اکثریت حاصل کرکے مطلق العنانیت کا خواب دیکھنے کی بجائے دنیا کے متعدد مہذب ممالک کی طرح مل جل کر کسی متفقہ پروگرام کی بنیاد پر سیاسی گروہ بندی اور اشتراک پیدا کرنے کی منصوبہ بندی کرنی چاہئے۔
اسی طرح ذاتی دشمنیوں کو دفن کرکے مل جل کر قوم و ملک کی ترقی کے لئے کام کرنے کا جذبہ پیدا ہوگا۔ البتہ اگر اب بھی جیت کو مخالفین کو مسترد کرنے اور ہارنے کے بعد دھاندلی کا شور مچانے کا سلسلہ جاری رکھا گیا تو عوام کی مایوسی کسی طوفان کی صورت بھی اختیار کرسکتی ہے۔ سیاسی لیڈر یہ بھول جائیں کہ ایسے کسی طوفان میں صرف مخالفین ڈوبیں گے اور ان کا دامن محفوظ رہے گا۔ اب کوئی کشتی نوح کسی پاک باز کو بچانے کے لئے دستیاب نہیں ہوگی۔
( بشکریہ : کاروان ناروے )
فیس بک کمینٹ