کراچی : متحدہ قومی مومنٹ (ایم کیو ایم) کے سربراہ خالد مقبول صدیقی نے ایک نیوز کانفرنس سے خطاب کرتے ہوئے کہا کہ اتوار کراچی اور حیدر آباد میں ہونے والے بلدیاتی انتخابات کو تسلیم نہیں کرتے ہیں۔ انھوں نے کہا کہ الیکشن کمیشن کے رویے پر ان انتخابات کا بائیکاٹ کرتے ہیں۔
ان کے مطابق ہمارے الیکشن میں جانے کا مطلب یہ ہوگا کہ کہ ہم نے حلقہ بندیوں کو تسلیم کر لیا ہے۔
ایم کیو ایم کے دیگر رہنماؤں کے ہمراہ اس نیوز کانفرنس میں انھوں نے مزید کہا ہے کہ نامکمل فہرستوں پر انتخابات کرا کر کس کو جتوانے کی کوشش کی جا رہی ہے۔ ان کے مطابق بلدیاتی الیکشن میں پہلے ہی دھاندلی ہو چکی ہے۔
خالد مقبول کے مطابق ان کی کوشش میئر کے لیے نہیں بلکہ اس شہر کی صحیح نمائندگی کے لیے ہے۔ ان کے مطابق یہ ایک سازش ہے اور جماعت اسلامی بھی اس سازش کا حصہ ہے۔
ان کے مطابق کل جو بھی جیتے گا وہ ایم کیو ایم کی خیرات پر جیتے گا۔
خالد مقبول صدیقی نے کہا وہ وفاقی حکومت کا ساتھ دیتے رہیں گے اور ملک کی معاشی حالات کے پیش نظر اس وقت حکومت کو بلیک میل نہیں کریں گے۔