ڈیر غازی خان (نمائندہ گردو پیش ) آئی جی پنجاب عامر ذوالفقار خان کی آر پی او آفس ڈی جی خان آمد ، اعلی سطحی اجلاس کی صدارت کی ۔ایڈیشنل آئی جیز جنوبی پنجاب ، سپیشل برانچ ، سی ٹی ڈی ، آر پی او ڈی جی خان ، ڈی آئی جی آپریشنز پنجاب ، ڈی پی او ڈی جی خان سمیت دیگر افسران نے اجلاس میں شرکت کی ۔ آئی جی پنجاب کو تونسہ شریف میں پولیس چوکی پر دہشت گرد حملے کی ابتدائی تحقیقات بارے آگاہ کیا گیا۔ آئی جی پنجاب نے واقعہ کی تمام پہلوؤں سے انکوائری کرتے ہوئے غفلت کے مرتکب اور ذمہ داروں کے خلاف کارروائی کا حکم دیا۔ ڈی آئی جی ایڈمن اینڈ اسٹیبلشمنٹ جنوبی پنجاب محمد سلیم کو چوبیس گھنٹوں کے اندر واقعہ کی تفصیلی انکوائری رپورٹ سی پی او بھجوانے کی ہدایت کی گئی ۔ آئی جی پنجاب نے اجلاس سے خطاب کرتے ہوئے کہا کہ دہشت گردی میں ملوث منظم گروہوں کے خلاف زیرو ٹالرینس کے تحت کریک ڈاؤن میں مزید تیزی لائی جائے ۔ بارڈر ایریا میں موجود چیک پوسٹوں پر نفری کی تعداد کو بڑھایا جائے ، زیادہ وسائل کے ساتھ ماہر سنائپرز کو بھی تعینات کیا جائے۔ دہشت گردوں اور انکے سہولت کاروں کو بھی قانون کے کٹہرے میں لاکر قرار واقعی سزائیں دلوائی جائیں ۔ ایڈیشنل آئی جی جنوبی پنجاب کچہ سمیت دیگر حساس علاقوں میں پولیس آپریشنز کی خود نگرانی کریں ۔ سرچ اور کومبنگ آپریشنز کی رپورٹس روزانہ کی بنیاد پر باقاعدگی سے سنٹرل پولیس آفس بھجوائی جائیں ۔ پولیس ٹیمیں حساس علاقوں میں اپنی پٹرولنگ بڑھائیں ۔ مجرمان کی نقل و حرکت ختم کرنے کیلئے سندھ اور بلوچستان پولیس سے کوارڈی نیشن کو مزید بہتر بنایا جائے ۔ قبل ازیں آئی جی پنجاب نے پولیس لائنز ڈی جی خان میں شہید ہیڈ کانسٹیبل مظہر اقبال کی نماز جنازہ میں شرکت کی ۔آئی جی پنجاب نے شہید کے جسدِ خاکی پر پھول چڑھائے اور درجات کی بلندی کیلئے فاتحہ خوانی کی ۔
دریں اثناء ایڈیشنل آئی جی جنوبی پنجاب صاحبزادہ شہزاد سلطان نے سی پی او ملتان شاکر داوڑ اور اے آئی جی آپریشنز جنوبی پنجاب قاضی علی رضا کے ہمراہ وہوا ضلع تونسہ دہشتگردوں کے حملہ میں زخمی ہونے والے کانسٹیبل کی عیادت کیلئے نشتر ہسپتال کا دورہ کیا انہوں نے کانسٹیبل کو نقد انعام دیا اور صحت یابی کیلئے دعا کی ایڈیشنل آئی جی نے ڈاکٹروں سے ملاقات کی اور بہترین علاج معالجہ کی ہدایت کی انہوں نے خیالات کا اظہار کرتے ہوئے کہا کہ امن کی راہ میں زخمی جوان ہمارا فخر اور شہید ہمارے سروں کا تاج ہیں شر پسند عناصر کے خلاف پولیس قربانیوں سے دریغ نہیں کرے گی زخمی کانسٹیبل کو تمام تر سہولیات فراہم کی جائیں گی اس موقع پر ایڈیشنل آئی جی نے سی پی او ملتان کو سیکیورٹی انتظامات سخت کرنے کی ہدایت کی اور کہا کہ ڈیوٹی پر موجود افسران و جوان چوکس ہو کر فرائض سر انجام دیں جرائم پیشہ عناصر سے نمٹنے کے جنوبی پنجاب میں سیکیورٹی مزید الرٹ کر دی گئی ہے گزشتہ شب جھنگی چیک پوسٹ ضلع تونسہ پر نامعلوم ملزمان کی فائرنگ سے ایک جوان مظہر خان شہید اور کانسٹیبل محمد رمضان زخمی ہوئے تھے ۔
فیس بک کمینٹ