غیرسرکاری تنظیم کے زیراہتمام سکول کے بچوں کا عافیت سنٹر کادورہ، بزرگوں میں تحائف تقسیم کیے

ملتان:غیرسرکاری تنظیم ٹائڈز آف ہوپ(امیدبہار)کے زیراہتمام عمررسیدہ افراد کے ساتھ عافیت سنٹر میں بچوں کی ملاقات کا اہتمام کیاگیا۔ اس موقع پر بچوں نے عمررسیدہ افراد کے ساتھ خوشگوار لمحات گزارے۔ انہیں پھلوں کے پودے پیش کیے تاکہ وہ تنہائی کے لمحات میں ان پودوں کی دیکھ بھال کریں۔ بچوں نے بزرگوں میں تحائف بھی تقسیم کیے۔
اس موقع پربات کرتے ہوئے عمررسیدہ افراد نے کہاکہ ہمیں ان بچوں کے ساتھ مل کر تازگی اورزندگی کااحساس ہوا ہے۔ انہوں نے کہاکہ یہ بچے ہمارا مستقبل ہیں اور ہماری ان سے بہت سی امیدیںوابستہ ہیں۔
اس موقع پرعافیت سنٹر کی انچارج سمیعہ منیر نے کہاکہ عافیت سنٹر میں مقیم بزرگوں کےساتھ بچوں کی یہ ملاقات منفرد بھی ہے اور ایسے دوروں کے ذریعے ان بزرگوں کوخوشی کے جو لمحات میسرآتے ہیں وہ ان کے چہروں سے عیاںہیں۔ انہوں نے کہاکہ عافیت سنٹر محدود وسائل کے باوجود ان بزرگوں کی دیکھ بھال کررہاہے۔ ہم انہیں کھانا بھی دے رہے ہیں اوران کی صحت کابھی خیال کررہے ہیں۔