گیانا (خصوصی رپورٹ ) ٹی ٹوئنٹی ورلڈ کپ کرکٹ ٹورنامنٹ کے دوسرے سیمی فائنل میں دفاعی چیمپئن انگلینڈ کو شکست دے کر بھارت فائنل میں پہنچ گیا، گیانا میں ہدف کے تعاقب میں انگلش بیٹنگ لائن ریت کی دیوار ثابت ہوئی، نئے ٹی ٹوئنٹی چیمپئن کا فیصلہ 29 جون کو ہو گا۔ جمعرات کے روز بھارت اور انگلینڈ کے درمیان آئی سی سی ٹی 20 ورلڈ کپ کے دوسرے سیمی فائنل میں انگلینڈ نے ٹاس جیت کر پہلے باؤلنگ کا فیصلہ کیا۔
گیانا کے پروویڈنس اسٹیڈیم میں آئی سی سی ٹی ٹوئنٹی ورلڈ کپ 2024 کا دوسرا سیمی فائنل بھارت اور انگلینڈ کے درمیان کھیلا گیا۔ پاکستانی وقت کے مطابق میچ کا ٹاس 7 بجے ہونا تھا جو بارش کے باعث وقت پر نا ہوسکا جبکہ میچ شروع ہونے کا وقت 7 بجکر 30 منٹ تھا تاہم میچ اپنے مقررہ وقت پر شروع نہیں ہوسکا۔
تاخیر سے شروع ہونے والے میچ کا ٹاس جیتنے کے بعد بھارت نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 171 رنز بنائے۔تاہم جواب میں انگلینڈ کی پوری ٹیم 17 ویں اوور میں 103 رنز پر ڈھیر ہو گئی۔ اس سے قبل آئی سی سی ٹی 20 ورلڈ کپ کے پہلے سیمی فائنل میں جنوبی افریقا نے افغانستان کو 9 وکٹوں سے شکست دے کر پہلی بار میگا ایونٹ کے فائنل کیلئے کوالیفائی کیا تھا۔ ٹرینیڈاڈ کے برائن لارا سٹیڈیم میں میگا ایونٹ کے پہلے سیمی فائنل میں جنوبی افریقا نے افغانستان کا 56 رنز کا آسان ہدف 8.5 اوورز میں ایک وکٹ کے نقصان پر حاصل کر لیا تھا۔ واضح رہے کہ بھارت کی فتح کے بعد 29 جون کو ٹورنامنٹ کا فائنل جنوبی افریقہ اور بھارت کے درمیان کھیلا جائے گا۔ دونوں ٹیمیں اب تک ٹورنامنٹ میں ناقابل شکست ہیں۔
فیس بک کمینٹ