صدر زرداری صحت یاب : کورونا ٹیسٹ منفی آنے کے بعد ہسپتال سے چھٹی مل گئی

کراچی : صدر مملکت آصف علی زرداری کو 10 روز بعد کراچی کے نجی ہسپتال سے ڈسچارج کر دیا گیا۔ ڈان نیوز کے مطابق صدر مملکت کے ذاتی معالج ڈاکٹر عاصم نے بتایا کہ صدر آصف زرداری کو ہسپتال سے ڈسچارج کردیا گیا، انہیں مزید فزیو تھراپی کا مشورہ دیا گیا ہے۔قبل ازیں، ڈاکٹر عاصم نے بتایا تھا کہ صدر مملکت آصف علی زرداری کا کورونا ریپڈ ٹیسٹ منفی آیا ہے، اور ان کا تاحال انفیکشنز ڈیزیز ماہرین کی زیر نگرانی علاج جاری ہے۔ ان کا کہنا تھا کہ آصف علی زرداری کی فزیو تھراپی بھی کی جا رہی ہے، صدر مملکت مزید ایک سے دو دن ہسپتال میں زیر علاج رہیں گے۔
واضح رہے کہ 31 مارچ کو صدر مملکت آصف زرداری کی طبیعت ناساز ہوگئی تھی جس کے باعث انہیں نوابشاہ سے کراچی منتقل کیا گیا تھا۔ صدر آصف زرداری انفیکشن اور بخار میں مبتلا ہوئے تھے جس کے باعث وہ زرداری ہاؤس نوابشاہ میں پارٹی کارکنوں اور رہنماؤں عید بھی نہیں مل سکے تھے، صدر آصف زرداری کو نجی ہسپتال میں داخل کیا گیا تھا۔ 2 اپریل کو ذاتی معالج ڈاکٹر عاصم حسین نے بتایا تھا کہ مختلف ٹیسٹوں کے بعد اس بات کی تصدیق ہوئی ہے کہ صدر مملکت کورونا میں مبتلا ہیں اور انہیں اس وقت آئیسولیشن میں رہنے کا مشورہ دیا گیا ہے۔انہوں نے کہا تھا کہ ماہرین کی ایک ٹیم ان کی دیکھ بھال کر رہی اور صدر مملکت کی حالت بہتر ہے۔
5 اپریل کو صدر مملکت کے ذاتی معالج ڈاکٹر عاصم حسین کا کہنا تھا کہ صدر مملکت آصف علی زرداری کی صحت بتدریج بہتر ہورہی ہے، کل یا پرسوں تک انہیں ہسپتال سے رخصت دیکر گھر بھیج دیا جائے گا۔
( بشکریہ : ڈان نیوز )