لاہور کی انسداد دہشت گردی عدالت نے پاکستان تحریک انصاف (پی ٹی آئی) کے رہنما شاہ محمود قریشی، میاں محمود الرشید سمیت دیگر کے خلاف 9 مئی جلاؤ گھیراؤ کے 4 مقدمات میں پراسیکیوشن سے مزید گواہوں کو طلب کرلیا۔
اے ٹی سی عدالت کے جج منظر علی گل نے کوٹ لکھپت جیل میں کیسز کی سماعت کی۔
اس موقع پر زیر حراست ملزم میاں محمود الرشید، شاہ محمود قریشی سمیت دیگر ملزمان کو پیش کیا گیا۔
عدالت نے پراسکیوشن سے مزید گواہوں کو طلب کرلیا
انسدادِ دہشت گردی عدالت نے تھانہ شادمان جلاؤ گھیراؤ کے مقدمے میں گواہوں کے بیانات قلمبند کیے اور 17 اپریل تک کیسز کی سماعت ملتوی کردی۔
پس منظر
یاد رہے کہ گزشتہ برس 9 مئی کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا۔
احتجاج کے دوران لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔
مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاؤس بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو)کا ایک گیٹ بھی توڑ دیا تھا۔
اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی رہنماؤں اور کارکنان کے خلاف مقدمات بھی درج کیے گئے تھے۔
فیس بک کمینٹ