سخن ور فورم کا اعزاز۔۔ملتان کی طرز پر پنجاب کی ہر آرٹس کونسل میں ادبی بیٹھک قائم کرنے کاحکم

ملتان کی ادبی بیٹھک کی طرز پر حکومت پنجاب نے تمام آرٹس کونسلوں میں ادبی بیٹھکیں قائم کرنے کا حکم دیا ہے۔ اس سلسلے میں احکامات گزشتہ دنوں تمام آرٹس کونسلوں کو موصول ہوگئے جس کے بعد پنجاب کے مختلف شہروں میں ادبی بیٹھکوں کے قیام کاسلسلہ شروع ہوگیا ہے۔ اس سلسلے میں پہلی ادبی بیٹھک ڈیرہ غازی خان آرٹس کونسل میں قائم کردی گئی ہے۔ واضح ہو کہ ملتان آرٹس کونسل میں ادبی بیٹھک 2010میں قائم کی گئی تھی اوراس کے بعد سے اب تک اس کے چارسو سے زیادہ اجلاس ہوچکے ہیں۔
سخن ورفورم کے چیئرمین رضی الدین رضی نے اس حوالے سے اے پی پی سے بات چیت کرتے ہوئے کہا کہ پنجاب بھر میں سخن ورفورم کی طرز پر ادبی بیٹھکوں کا قیام ہمارے لیے باعث اعزاز ہے۔ ملتان کی ادبی بیٹھک کو بعض لوگوں کی جانب سے تنقید کا نشانہ بھی بنایاگیا لیکن وقت نے ثابت کیا کہ ہم نے گیارہ برس پہلے جو فیصلہ کیاتھاوہ ادب کے فروغ کے لیے قابل تقلید تھا اور اب اسی سلسلے کو آگے بڑھایا جارہاہے۔
ریذیڈنٹ ڈائریکٹر ڈیرہ غازی خان آرٹس کونسل سلیم قیصر نے بتایا کہ ڈیرہ غازی خان ادبی بیٹھک یہاں کے ادیبوں ،شاعروں کے لیے ایک بہترین پلیٹ فارم ثابت ہوگی اوراس کے اجلاسوں کا شیڈول جلد جاری کردیا جائے گا۔