بڈاپسٹ : پاکستان کے ارشد ندیم نے پیرس اولمپکس کے جیولن تھرو مقابلے کیلئے کوالیفائی کرلیا۔ ارشد ندیم نے پیرس اولمپکس کا ٹکٹ ہنگری میں ورلڈ ایتھلیٹکس چیمپئن شپ کے دوران شاندار تھرو کر کے حاصل کیا۔
بڈاپسٹ میں ورلڈ ایتھلیٹکس چیمپئن شپ کے جیولن تھرو مقابلوں میں ارشد ندیم نے گروپ بی میں اپنی تیسری باری میں 86.79 کی تھرو کی اور ایونٹ کے فائنل کیلئے بھی جگہ بنائی۔پیرس اولمپکس کے کوالیفائنگ اسٹینڈرڈ کے مطابق جیولن تھرو میں 85.5 کی تھرو پر کھلاڑی اولمپکس کیلئے براہ راست کوالیفائی کر جائے گا، یوں ارشد ندیم نے پیرس اولمپکس میں جگہ پکی کر لی۔
ارشد ندیم نے مسلسل دوسری مرتبہ اولمپکس مقابلوں کیلئے کوالیفائی کیا ہے، اس سے قبل ساف چیمپئن شپ میں شاندار تھرو کرکے انہوں نے ٹوکیو اولمپکس میں جگہ بنائی تھی۔
ارشد ندیم نے 86.79 کی تھرو کے ساتھ ورلڈ ایتھلیٹکس چیمپئن شپ کے جیولن تھرو فائنل کیلئے بھی براہ راست کوالیفائی کر لیا۔ ارشد نے اس سے قبل پہلی باری میں 70.63 اور دوسری میں 86.79 کی تھرو کی تھی ۔
دفاعی چیمپئن اینڈرسن پیٹرز فائنل میں نہ آسکے، انہوں نے 78.49 کی تھرو کی جو انہیں ٹاپ 12 میں رکھنے کیلئے ناکافی تھی جبکہ بھارتی جیولن تھرور نیرج چوپڑا نے 88.77 کی تھرو کی اور پیرس اولمپکس کے لیے کوالیفائی کر لیا۔
ارشد ندیم کا تعلق میاں چنوں کے نواحی گاؤں چک نمبر 101-15 ایل سے ہے۔
ان کے والد راج مستری ہیں لیکن اُنھوں نے اپنے بیٹے کی ہر قدم پر حوصلہ افزائی کی۔ ارشد ندیم کے کریئر میں دو کوچز رشید احمد ساقی اور فیاض حسین بخاری کا اہم کردار رہا ہے۔