بھارت کی انڈونیشیا کیخلاف 16 گولز سے فتح، پاکستان ایشیا کپ اور ورلڈکپ دونوں سے باہر

ایشیا ہاکی کپ ٹورنامنٹ میں بھارت نے انڈونیشیا کو 0-16 گولز سے شکست دے کر نہ صرف سپر فور مرحلے کیلئے کوالیفائی کرلیا بلکہ پاکستان کو ایشیا کپ سے باہر بھی کردیا۔
ایشیا کپ سے باہر ہونے کے ساتھ ساتھ پاکستان ہاکی ورلڈکپ کیلئے بھی کوالیفائی کرنے سے محروم رہ گیا ہے۔
جکارتہ میں ہونے والے ایشیا ہاکی کپ ٹورنامنٹ میں آج پہلے پاکستان کا میچ جاپان کے ساتھ ہوا جس میں جاپان نے پاکستان کو 2-3 سے شکست دی۔ پاکستان نے جاپان کیخلاف دو گولز ضائع کیے۔
پاکستان کا ایک گول گراؤنڈ میں 12 کھلاڑیوں کی موجودگی کی وجہ سے رد کیا گیا جبکہ ایک گول فاؤل کی وجہ سے مسترد ہوا۔ اگر یہ دونوں گولز شمار ہوتے تو پاکستان میچ جیت سکتا تھا۔
پاکستان کی شکست کے بعد بھارت کو سپر فور مرحلے میں رسائی کیلئے انڈونیشیا کو کم سے کم 16 گولز سے شکست دینی تھی اور اس نے یہ کارنامہ انجام دے دیا۔
بھارت نے انڈونیشیا کو 0-16 گول سے شکست دی جس کے بعد پاکستان ایونٹ سے باہر ہوگیا۔
ساتھ ہی سُپر فورمرحلے میں نہ پہنچنے کے سبب پاکستان ہاکی ورلڈ کپ میں بھی شرکت سے محروم ہوگیا ہے۔
خیال رہے کہ ہاکی ورلڈکپ جنوری 2023میں بھارت میں شیڈول ہے۔
(بشکریہ: جیو نیوز)