لاہور : بزرگ سیاست دان،سابق نگران وزیر اعظم اور چیف آف تمن مزاری قبائل سردار میر بلخ شیر خان مزاری طویل علالت کے بعد انتقال کر گئے۔ ان کی عمر 94 برس تھی ۔ میر بلخ شیر خان مزاری کے بیٹے ریاض مزاری نے اپنے والد کے انتقال کی خبر کی تصدیق کی ہے ۔ وہ لاہور کے نجی اسپتال میں زیر علاج تھے۔
سردار بلخ شیر مزاری سابق ڈپٹی اسپیکر پنجاب دوست محمد مزاری کے دادا تھے ، وہ 1928ء میں رحیم یار خان کے علاقے کوٹ کرم خان میں پیدا ہوئے تھے جبکہ 1993ء میں ملک کے نگراں وزیراعظم رہے۔
وزیراعظم شہباز شریف نے سردار بلخ شیر مزاری کے انتقال پر دکھ کا اظہار کرتے ہوئے کہا ہے کہ سابق نگراں وزیراعظم بلوچستان اور پاکستانی سیاست کی قدآور شخصیت تھے، ملک و قوم کیلئے ان کی خدمات تادیر یاد رکھی جائیں گی۔وزیراعلیٰ سندھ سید مراد علی شاہ نے بھی سردار بلخ شیر مزاری کے انتقال پر گہرے دکھ کا اظہار کیا ہے۔