لاڑکانہ:پیپلز ہاؤسنگ اسکیم عوام کو اثاثوں کی منتقلی ہے، بلاول بھٹو زرداری

لاڑکانہ :پاکستان پیپلز پارٹی (پی پی پی) کے چیئرمین اور وزیر خارجہ بلاول بھٹو زرداری نے کہا ہے کہ آج لوگوں کو شاید احساس نہ ہو لیکن ہم نے پیپلز ہاؤسنگ اسکیم کا منصوبہ دیا ہے وہ ریاست سے خواتین کو اثاثوں کی منتقلی ہے۔
لاڑکانہ میں سیلاب متاثرین کو گھر تعمیر کروا کر دینے کے پروگرام سے خطاب کرتے ہوئے وزیر خارجہ بلاول بھٹو زرداری نے کہا کہ سیلاب سے آپ کو جو نقصان ہوا تھا اس کو آہستہ آہستہ درست کرنے جا رہے ہیں۔
وزیر خارجہ بلاول بھٹو زرداری نے کہا کہ ہمیں صوبہ سندھ میں 20 لاکھ گھر تعمیر کرانے ہیں جس میں وقت ضرور لگے گا لیکن میرا وعدہ ہے کہ سیلاب میں جس کے بھی گھر کو نقصان ہوا ان کو نہ صرف مالی مدد فراہم کی جائے گی بلکہ ان کو مکان کے مالکانہ حقوق بھی دیں گے۔
بلاول بھٹو زرداری نے کہا کہ یہ اس صوبے سے ایک انقلاب شروع ہو رہا ہے، اس وقت پورے ملک میں مہنگائی، بے روزگاری اور معاشی مشکلات ہیں اور اس کا حل پیپلز پارٹی کی نظر میں ایک ہی ہے کہ عام آدمی، غریبوں کی مدد کرنی ہے۔
انہوں نے کہا کہ اگر ہم پاکستان کے عام آدمی کو معاشی طور پر مضبوط بنائیں گے تو وہ دن بھی دور نہیں جب ہم ملک کو بھی اپنے پاؤں پر کھڑا کریں گے۔
بلاول بھٹو زرداری نے کہا کہ سیلاب سے ہمیں تاریخی نقصان ہوا تھا لیکن جب ہمارا پیپلز ہاؤسنگ اسکیم کا کام مکمل ہوجائے گا تو آپ کی مالی پوزیشن سے سیلاب سے پہلے کی نسبت مزید بہتر ہوگی، اگر آگے ایسا کوئی سیلاب آیا بھی تو آپ کے گھر کو نقصان نہیں ہوگا کیونکہ یہ مکان اس طرح بنائے گئے ہیں کہ ان کو سیلاب میں کوئی نقصان نہیں ہوگا۔
انہوں نے کہا کہ جن کا اپنا مکان ہو اور مالکانہ حقوق نہ ہوں تو وہ غیریقینی میں زندگی گزارتے ہیں، ان کو معلوم نہیں ہوتا کہ کب ایسا وقت آئے جب ان سے اپنا گھر چھینا جائے، اب جب ہم نے آپ کو اپنے گھر کا مالک بنایا ہے، زمین دی ہے تو ایک ایسا اثاثہ دیا ہے جن کو گھر کی عورتوں کے نام کیا ہے۔
بلاول بھٹو زرداری نے کہا کہ ہمیں شہید بے نظیر بھٹو اور سابق صدر آصف علی زرداری نے سکھایا ہے کہ جب آپ عورتوں کو معاشی طور پر مضبوط کرتے ہیں تو پورے خاندان کو مضبوط کرتے ہیں جس میں اگلے نسل کا بھی خیال رکھا جاتا ہے۔
انہوں نے کہا کہ اگر ایسی کوئی صورتحال ہو کہ آپ کاروبار کرنا چاہیں یا قرض لینا چاہیں تو آپ کے پاس ایسا اثاثہ ہے کہ آپ بینک کو قرض لینے کے لیے کہہ سکتے ہیں۔
وزیر خارجہ نے کہا کہ پیپلز پارٹی نے ایک حادثہ کو ایک موقع میں تبدیل کیا ہے، ہماری کوشش ہے کہ سندھ بھر میں سیلاب متاثرین کو نہ صرف گھر بناکر دیں گے بلکہ ان کو اپنا مالکانہ حقوق بھی دیں گے اور ان کو معاشی طور پر مضبوط کریں گے جس سے پاکستان اور سندھ کی معیشت کا فائدہ ہوگا۔
انہوں نے کہا کہ ہم قائد عوام شہید ذولفقار علی بھٹو اور شہید بے نظیر بھٹو کے نظریہ کو سندھ کے ہر اضلاع میں لے کر جائیں گے اور الیکشن دور نہیں ہے، اسی قسم کے منصوبے بلوچستان خیبپختونخوا اور پنجاب کے عوام کے لیے بھی لے جائیں گے۔
چیئرمین پیپلز پارٹی نے کہا کہ دوسری جماعتیں امیر لوگوں کو مزید امیر بناتی ہیں لیکن پیپلز پارٹی انکم سپورٹ پروگرام کے ذریعے غریب لوگوں کو مالی مستحکم کر رہی ہے، مزید کہا کہ آج لوگوں کو شاید احساس نہ ہو لیکن ہم نے یہ جو منصوبہ دیا ہے وہ اثاثوں کی منتقلی ہے جو کہ ریاست اور سندھ حکومت سے زمین لے کر ہم آپ لوگوں کو دے رہے ہیں۔
(بشکریہ:ڈان نیوز)