خانیوال کے قریب دہشت گردوں کی فائرنگ سے محکمہ انسداد دہشت گردی ملتان کے دو افسران جاں بحق ہو گئے۔ جاں بحق ہو نے والوں میں سی ٹی ڈی ملتان کے ڈپٹی ڈائریکٹر نوید صادق اور انسکپٹر ناصر عباس شامل ہیں۔
دونوں افسران پر پیرووال کے قریب بسم اللّٰہ ہائی وے پر موٹر سائیکل سواروں نے اس وقت فائرنگ کی جب وہ ہوٹل پر چائے پینے کے بعد گاڑی میں سوار ہورہے تھے واقعہ کے فوری بعد جائے وقوعہ پر پولیس و دیگر فورسز کے اعلی حکام پہنچ گئے علاقہ سیل کردیا گیا کہ دہشت گردوں کی فائرنگ کا نشانہ بن گئے۔ملزمان واردات کے بعد فرار ہو نے میں کامیاب ہو گئے۔
ایڈیشنل آئی جی پولیس شہزادہ سلطان اطلاع ملتے ہی جائے واردات کی طرف روانہ ہو گئے۔ ترجمان جنوبی پنجاب پولیس کے مطابق شہزادہ سلطان نے کہا ہے کہ یہ دہشت گردی کی واردات ہے۔ ذمہ دار افراد کو منطقی انجام تک پہنچایا جائے گا ۔ انہو ں نے کہا کہ پولیس قانونی پہلوؤں کو مد نظر رکھتے ہو ئے اقدامات کر رہی ہے۔ حقائق جلد سامنے لائے جائیں گے۔ دریں اثناء واردات کے بعد خانیوال اور ملتان سمیت جنوبی پنجاب میں سیکورٹی ہائی الرٹ کر دی گئی ہے۔