اسلام آباد : ملک بھر میں آج جشن میلاد النبی صلی اللّٰہ علیہ والہ وسلم پوری عقیدت و احترام اور جوش و جذبے کے ساتھ منایا جا رہا ہے۔دن کے آغاز پر وفاقی اور صوبائی دارالحکومتوں میں توپوں کی سلامی دی گئی۔ جشن میلادالنبیﷺ پر آج ملک بھر میں عام تعطیل ہے۔ملک بھر میں دن کا آغاز مساجد میں نماز فجر کے بعد ملکی سلامتی کے لیے خصوصی دعاؤں کے ساتھ ہوا۔
عید میلاد النبیﷺ کے سلسلے میں ملتان کراچی، لاہور، اسلام آباد، پشاور اور کوئٹہ سمیت چھوٹے بڑے شہروں میں جلوس برآمد کئے جائیں گے اور درود وسلام کی محفلیں ہوں گی۔
میلاد مصطفیٰ ﷺ کے سلسلے میں حکومتی اور مذہبی تنظیموں، میلاد کمیٹیوں اور لوگوں نے جلسے جلوس، سیرت النبیﷺ کانفرنسز، سیمنار سمیت مختلف پروگراموں کا انعقاد کیا جس میں علما، آئمہ حضرات مساجد میں سیرت النبیﷺ اور حیات طیبہ پر روشنی ڈالیں گے۔
رحمۃ اللعالمینﷺ کی ولادت کے دن کی خوشی میں گھروں، دفاتر، مساجد، پارکس، تفریحی مقامات، گلیوں، مارکیٹوں، بازاروں، شاہراہوں کو سبز پرچموں، برقی قمقموں، آرائشی محرابوں، خوبصورت فلیکس سائنز، بینرز، جھنڈیوں اور دیگر زیبائشی اشیا سے دلہن کی طرح سجایا گیا۔
اس سال وزیراعظم کی خصوصی ہدایت پر 3 سے 12 ربیع الاول تک مرکزی اور صوبائی حکومتوں کی سطح پر عشرہ رحمۃ للعالمینﷺ منایا جارہا ہے۔
سرکاری خبررساں ادارے اے پی پی کی رپورٹ کے مطابق رواں سال بھی وزارت مذہبی امور کی طرف سے سرکار دوعالمﷺ کی سیرت طیبہ اور حیات طیبہ کے مختلف پہلوؤں کو اجاگر کرنے کے لیے کتب سیرت، کتب نعت مقالات سیرت اور خواتین کے لیے مذہبی کتب کے مقابلے منعقد کئے گئے ہیں۔دوسری جانب دنیا بھر میں پاکستانی سفارتخانوں اور فارن مشنز میں بھی سیرت طیبہ کے مختلف پہلوؤں کو ا جاگر کرنے کے لیے سیرت کانفرنسز کا انعقاد کیا جائے گا ۔
علاوہ ازیں عیدمیلاد النبیﷺ کی تمام تقاریب کے انعقاد کے موقع پر کووڈ 19کے ایس ا و پیز کا مکمل طور پر خیال رکھا جائے گا، جبکہ اس سلسلے میں سیکیورٹی کے خصوصی انتظامات اور ٹریفک پلانز جاری کیے گئے ہیں۔