ڈسٹرکٹ جیل ملتان میں پاکستان کی پہلی”جیل لائبریری“کاقیام

ملتان: اے پی پی :ڈی آئی جی جیل خانہ جات ملتان ریجن محسن رفیق چوہدری نے کہاہے کہ وزیراعلیٰ پنجاب کی ہدایات کے مطابق جیل میں قیدیوں کی اصلاح کے لئے مختلف منصوبوں پرکام جاری ہے اورڈسٹرکٹ جیل ملتان میں قیدیوں کے لئے پاکستان کی پہلی جیل لائبریری کاقیام عمل میں لایاگیاہے ۔یہ سٹیٹ آف دی آرٹ لائبریری ہے جس کامقصد یہ ہے کہ قیدیوں اورجیل کے عملے کی خوبصورت کتابوں تک رسائی آسان بنائی جاسکے ۔
ہم نے جیل میں علم کادروازہ کھول دیاہے ۔انہوں نے کہاکہ یہ پنجاب ہی نہیں ملک بھرکی جیلوں میں باضابطہ طورپرقائم ہونے والی پہلی لائبریری ہے ۔اس سے پہلے مختلف جیلوںمیں کتابوں کے گوشے توموجودہیں مگرلائبریری موجودنہیں ۔اس لائبریری میں ابتدائی طورپردوہزارسے زیادہ کتابیں رکھی گئی ہیں جن میں ملتان کے ادیبوں ،شاعروں کی جانب سے تحفے میں دی گئی کتابیں بھی شامل ہیں ۔انہوں نے کہاکہ یہ لائبریری میرے پیش روظہیر احمد ورک کی کاوشوں کانتیجہ ہے وہ اب یہاں سے جاچکے ہیں لیکن اس لائبریری کافیضان آنے والے برسوں میں بھی جاری رہے گا۔
ان خیالات کااظہارانہوں نے جمعرات کو خطے کے نامور شعراءاورادیبوں کے اعزازمیں منعقدہ تقریب سے خطاب کے دوران کیا۔ان قلمکاروں کو جیل انتظامیہ کی جانب سے لائبریری کے دورے کی دعوت دی گئی تھی ۔ادیب اورشاعر اپنے ہمراہ کتابوں کے تحائف بھی لائے ۔تقریب کی صدارت نامورادیب،ماہر اقبالیات ،مترجم اور”منشورالقران “کے مصنف انجینئرعبدالحکیم ملک نے کی ۔مہمان خصوصی نامور دانشور اورماہر قانون شاہدراحیل خان تھے ۔ میزبانی کے فرائض تقریب کے محرک نامور کمپیئر اورمصنف ناصرمحمود شیخ نے انجام دیئے ۔اس موقع پر سپرنٹنڈنٹ جیل ملتان نازک شہزادبھی موجودتھے ۔ تقریب سے اظہارخیال کرتے ہوئے قمررضاشہزاد ،رضی الدین رضی ،شاکر حسین شاکر،سید زاہدحسین گردیزی،سجاد جہانیہ،اشہرحسن کامران ،جہانزیب دھرالہ،میاں نورالحق جھنڈیر،عامرشہزاد صدیقی ،امجد فاروق ڈاھا،قیصر عباس صابر ،عبدالمحسن شاہین ،امجدبخاری،افتخارالحسن اوررفیق قریشی نے کہاکہ جیل میں لائبریری کاقیام ایک مستحسن عمل ہے اوریقینی طورپریہ ایسا کام ہے جس کی پیروی بھی ہونی چاہیے ۔
انہوں نے کہاکہ کتاب اورجیل کابہت گہراتعلق ہے،جیلوں میں بہت سی یادگارکتابیں لکھی گئیں جن میں سیاسی رہنماﺅں کی کتابیں اورآب بیتیاں بھی شامل ہیں ۔انہوں نے امید ظاہرکی کہ خواتین جیل ملتان سمیت اس خطے کی دیگرجیلوں میں بھی ایسی لائبریریاں جلد قائم کی جائیں گی ۔