اسلام آباد : آئل اینڈ گیس ریگولیتری اتھارٹی(اوگرا) نے سوئی سدرن اور سوئی ناردرن گیس کمپنی کو گیس کی قیمتوں میں 67.75 اور 74.42 فیصد اضافے کی منظوری دے دی۔
سوئی ناردرن گیس کمپنی اور سوئی سوئی سدرن گیس کمپنی کی درخواستوں پر اوگرا نے سوئی ناردرن کو موجودہ مالی سال کے لیے گیس کی اوسط مقررہ قیمت میں 406.68 روپے فی ایم ایم بی ٹی یو اور سوئی سدرن گیس کمپنی کو 469.28 روپے فی ایم ایم بی ٹی یو اضافے کی منظوری دے دی۔
دونوں کمپنیوں نے اوگرا سے قیمت میں اضافے کی درخواست کی تھی جس کا اطلاق جولائی 2022 سے ہو گا، اس سلسلے میں سوئی ناردرن نے 1294.02 روپے اور سوئی سدرن نے 667.44 روپے فی ایم ایم بی ٹی یو اضافے کی درخواست کی تھی۔
قیمتوں میں اضافے کا یہ فیصلہ وفاقی حکومت کو ارسال کردیا گیا ہے جو آئندہ 40 دن میں اس حوالے سے ریگولیٹری ادارے کو گیس کے کم از کم نرخوں اور ہر کیٹیگری کے ریٹیل صارفین کے لیے گیس کی قیمت کے حوالے سے سفارشات دینے کی پابند ہے۔
اوگرا نے اپنے فیصلے میں کہا کہ وفاقی حکومت اس بات کو یقینی بنائے کہ گیس کی فروخت کی قیمت اوگرا کی جانب سے متعین کردہ کمپنیوں کی مالی ضروریات سے کم نہ ہو۔
اگر وفاقی حکومت آئندہ 40 دن میں سفارشات پیش نہیں کرتی تو اوگرا نے گیس کے جن نرخوں کا تعین کیا ہے انہی کا نوٹیفکیشن جاری کردیا جائے گا۔
اپنی درخواست میں سوئی ناردرن نے کہا تھا کہ ان کے شارٹ فال کا تخمینہ 178.814ارب روپے لگایا گیا تھا جو پچھلے سال بھی 295.268ارب روپے تھا لہٰذا انہوں نے اوگرا سے گیس کے نرخ میں 1294.02 فی ایم ایم بی ٹی یو اضافے کی درخواست کی تھی۔
البتہ اوگرا کی جانب سے لگائے گئے تخمینے کے مطابق مالی سال 2023 میں قدرتی گیس کی فروخت کی قیمت پر لاگو نرخ کے مطابق ان کا رینیو شارٹ فال 109.18ارب روپے رہا اور انہیں 306.245 ارب کا ریونیو درکار ہے۔
اس کے علاوہ کمپنی نے کہا کہ رواں مالی سال کے دوران سوئی سدرن کو درکار ریونیو 327.227 ارب روپے ہے۔
( بشکریہ : ڈان نیوز )
فیس بک کمینٹ