اسلامی جمہوریہ پاکستان،جہاں رمضان کا مقدس ماہ ہو یا عیدین ہوں ،کوئی بھی مذہبی تہوار ہو اور یا پھر کوئی مجبوری، مسلمان قوم ذخیرہ اندوزی ،بلیک میلنگ اور سینہ زوری میں ہر سال نئے ریکارڈ قائم کرتی ہے اور تو اور، کورونا جیسی لاعلاج مہلک بیماری کا خطرہ سر پر منڈلا رہا ہوتو بھی ڈھٹائی پہلے سے چار گنا زیادہ دکھائی دیتی ہے. ماسک ہوں، سینیٹا ئزرز ہوں یا پھر اس سے متعلق ضروری اشیا، بلیک فروخت، منہ مانگی قیمت اور ذخیرہ اندوزی کے ریکارڈز پھر قائم ہورہے ہیں.
دوسری جانب ملاحظہ ہو، آسٹریلیا کے سابق ٹیسٹ اسپنر شین وارن نے اپنے ملک میں جاری کورونا وائرس کی مشکلات دیکھتے ہوئے ایسی مثال قائم کی ہے کہ جس کی نظیر موجودہ باب میں تلاش کرنا مشکل ہے. انہوں نے اعلان کیا ہے کہ انکی کمپنی“ جن “
ویسٹرن آسٹریلیا کے 2 ہسپتالوں میں سینیٹائرز کی سپلائی کرے گی.اس میں 2 باتیں اور بھی اہم ہیں .
پہلی یہ کہ مطلوبہ تعداد ہر حال میں پوری کی جائے گی.
دوسری یہ کہ قیمت لاگت کی لی جائے گی.کوئی منافع نہیں اور کوئی کاروبار نہیں اور یہ پریکٹس اس وقت تک جاری رہے گی کہ جب تک اس کی طلب ہوگی.
شین وارن پلے بوائے کے طور پر خاصی متنازعہ پہچان رکھتے ہیں. ان کے کردار و عمل پر اکثر تنقید ہوتی ہے لیکن آسٹریلیا کیلئے سب سے زیادہ ٹیسٹ وکٹ کا ریکارڈ رکھنے والے شین وارن نے انسانیت کیلئے اپنے کردار سے بڑھ کر عظیم مثال قائم کردی ہے .
شین وارن کہتے ہیں کہ میرے ملک پر مشکل وقت آیا ہے. میرے لوگوں کو شاید میری ضرورت ہے. میں اپنا کردار ادا کرنا چاہتا ہوں تو دوسروں کیلئے اس سے بھی بہتر کچھ کرنے کا جذبہ فراہم کرنا چاہتا ہوں.
پاکستان کی جب ہم بات کرتے ہیں تو یہاں شین وارن سے بڑے کرکٹرز بھی ہیں اور دوسرے شعبوں کی اہم شخصیات بھی لیکن اس انداز کی تاحال مثال ملنا مشکل ہے.
رہا یہ سوال کہ کیا ہماری ساری قوم ہی ایسی ہے؟
اگر ساری قوم ایسی نہیں تو پھر ماسک جیسی معمولی قیمت کی چیز 4 گنا قیمت پر کیوں فروخت ہورہی؟ سینیٹائزرز 90 سے 160 پھر 230 ، پھر ساڑھے 300 اور پھر 500 روپے سے بھی اوپر 4 دن میں کیسے فروخت ہورہے؟ یہ قوم ساری ایسی نہیں تو درد رکھنے والے بے بس کیسے ہیں؟اچھے لوگو ں کی جھلک کیوں مفقود ہے؟ صبح ،دوپہر، شام ٹی وی پر بھاشن دینے والے رہنما اور حکومتی ادارے کہاں ہیں؟ ریاست کی رٹ کدھر ہے؟
اگر ایسی بلیک میلنگ کرنے والی قوم کو میں ساری قوم نا لکھوں تو کیوں نا لکھوں؟
یہ حکومت میں بھی ہیں، یہ کاروبار میں بھی ہیں، یہ ریاستی مشینری کا جزو بھی ہیں تو یہ بے بس کیسے ہوسکتے؟
یہ بھی سب میں شامل ہیں. جن کےلئے کورونا جیسی خوفناک بیماری بھی ایک کمائی، بے رخی،غیر ذمہ داری اور ڈرامے بازی کرنے کا ایک "موقع "ہے.
شاباش ،شین وارن! آپ کے ایک عمل سے پاکستان میں بر سر اقتدار گروہ اور لوٹ مار میں مصروف قوم پھر بے نقاب ہوگئی.
فیس بک کمینٹ