مویشی منڈیوں میں گہما گہمی عروج پر پہنچ گئی،قربانی کےجانوروں کی قیمتوں میں اضافہ

ملتان:عید قربان سے ایک روز قبل مویشی منڈیوں میں گہما گہمی عروج پر پہنچ گئی شدید گرمی کے باوجود خریداروں اور آڑھتیوں کی بڑی تعداد مویشی منڈیوں میں موجود رہی۔ضلعی انتظامیہ کی جانب سے شیر شاہ روڈ ،کائیاں پور ،فاطمہ جناح ٹاون میں بکر منڈیاں قائم کی گئی ہیں۔اس کے علاوہ شہر کے مختلف حصوں میں غیر قانونی بکر منڈیوں میں بھی خرید و فروخت جاری رہی۔شیر شاہ سے آئے ہوئے ایک آڑھتی غلام فرید نے اے پی پی کو بتایا کہ لوگ اس مرتبہ بڑے جانوروں میں حصہ ڈال رہے ہیں۔ ایک خرید ار عبدالقیوم کے مطابق مارکیٹ میں نارمل بکرا0 4000ہزار سے 55000ہزار روپے میں فروخت ہورہا ہے جبکہ وزنی بکروں کی قیمتیں 80ہزار سے ایک لاکھ روپے تک پہنچ چکی ہیں۔ مقامی صحافی ناصر ظہیر کا کہنا ہے کہ ہم ہر سال بکر منڈی کا سروے کرتے ہیں لیکن اس مرتبہ تو قیمتوں میں غیر معمولی اضافہ دیکھنے میں آیا ہے ۔تین من وزنی بیل ایک لاکھ تیس ہزار سے لے کر ایک لاکھ پنتالیس ہزار روپے تک میں دستیاب ہے جبکہ خوبصورت بیلوں کی قیمتیں بھی لاکھوں میں ہیں۔