لندن : بانی تحریک انصاف عمران خان کی سابقہ اہلیہ جمائمہ گولڈاسمتھ نے پی ٹی آئی کے امیدواروں کی حمایت میں کی گئی سوشل میڈیا پوسٹ ڈیلیٹ کر دی۔
سابق وزیراعظم عمران خان کی سابقہ اہلیہ اور ان کے بیٹوں قاسم خان اور سلیمان خان نے 8 فروری کو پاکستان میں ہونے والے انتخابات سے ایک دن پہلے پاکستان تحریک انصاف کے امیدواروں کی حمایت کا اعلان کیا۔
عمران خان کے بیٹے قاسم خان نے سوشل میڈیا پر کی گئی پوسٹ میں لوگوں سے اپیل کی ہے کہ ووٹ ڈالنے کے بعد ہیش ٹیگ #votePTIکا استعمال کرتے ہوئے ویڈیو یا تصویر بنائیں اور بتائیں کہ ‘میں نے پی ٹی آئی کو ووٹ دیا’ اور سوشل میڈیا پر پوسٹ کریں۔
قاسم خان نے یہ ٹوئٹ اپنے غیر تصدیق شدہ اکاؤنٹ سے کیا لیکن اس کو توجہ اس وقت حاصل ہوئی جب جمائمہ نے اسے ری ٹوئٹ کیا۔قاسم خان نے انگریزی اور اردو دونوں زبانوں میں اپنے بڑے بھائی سلیمان خان کے ساتھ پی ٹی آئی کا جھنڈا تھامے یہ ٹوئٹ کی اور لوگوں سے 8 فروری کو پی ٹی آئی کو ووٹ دینے کی اپیل کی۔
قاسم خان اور سلیمان خان کی پی ٹی آئی کا جھنڈا تھامے وہی تصویر جمائمہ گولڈاسمتھ نے ہیش ٹیگ پاک الیکشن 8 فروری لکھ کر ٹوئٹ کی اور پھر 10 منٹ بعد جمائمہ نے وہ ٹوئٹ ڈیلیٹ کردی۔
البتہ قاسم خان کی ٹوئٹ پر ان کا ری پوسٹ اب بھی ان کی ایکس سابقہ ٹوئٹر وال پر موجود ہے۔ جمائمہ کی جانب سے 7 ہزار لوگوں کے شئیر کہے جانے کے بعد وہ ٹوئٹ ڈیلیٹ کی گئی۔
پاکستان تحریک انصاف انصاف کا بلے کو اپنا انتخابی نشان کے طور پر استعمال کرنے کا کیس ہارنے کے بعد جمائمہ اور قاسم نے اپنی پوسٹ میں صرف پی ٹی آئی کے جھنڈے کا استعمال کیا۔
22 دسمبر 2023 کو الیکشن کمیشن آف پاکستان نے پی ٹی آئی کو انٹرا پارٹی الیکشن نہ کروانے پر پارٹی کا انتخابی نشان بلا ان سے چھین لیا جس کے باعث پی ٹی آئی کے ہزاروں امیدواران مختلف انتخابی نشانوں پر آزاد حیثیت سے الیکشن لڑ رہے ہیں۔
اس سے قبل جمائمہ کی جانب سے اپنے بیٹے قاسم خان کے نام سے چلنے والے جعلی ایکس اکاؤنٹ کی نشاندہی کی گئی تھی جس پر پی ٹی آئی کی الیکشن کمپین کی حمایت کی جارہی تھی۔
دو دہائیوں قبل سابق وزیراعظم عمران خان کی اہلیہ رہنے والی جمائمہ گولڈاسمتھ نے لوگوں سے اس جعلی اکاؤنٹ کو ری پوسٹ کرنے کی اپیل کی لیکن اب اس بات کی تصدیق ہوچکی ہے کہ قاسم خان اپنا اکاؤنٹ بنا چکے ہیں۔
جمائمہ نے کہا تھا کہ ان کا کوئی بھی بیٹا ایکس اور دوسرے سوشل میڈیا اکاؤنٹ استعمال نہیں کرتا لیکن اب یہ بات واضح ہے کہ قاسم خان نے سوشل میڈیا کو حال ہی میں جوائن کیا ہے۔
جمائمہ نے پہلے بھی بتایا تھا کہ وہ سیاسی معاملات میں حصہ لینے سے اس پر بحث کرنے سے اور سیاسی جھگڑوں سے دوری بنائے رکھتی ہیں۔