پشاور : خیبرپختونخوا اسمبلی میں سینیٹ انتخاب میں پاکستان تحریک انصاف نے 6 اور اپوزیشن جماعتوں نے 5 نشستوں پر کامیابی حاصل کرلی۔خیبر پختونخوا میں سینیٹ کی 11 نشستوں پرووٹ ڈالے گئے اور اسمبلی کے تمام 145 اراکین نے ووٹ کاسٹ کیا۔ غیر حتمی و غیر سرکاری نتیجے کے مطابق 7 جنرل نشستوں میں سے 4 نشستوں پر پی ٹی آئی کامیاب قرار پائی، پی ٹی آئی کے مرادسعید، فیصل جاوید، مرزا آفریدی اور نورالحق قادری جنرل نشستوں پرجیتے۔غیرسرکاری نتیجے کے تحت اپوزیشن جماعتیں 3 جنرل نشستوں پرکامیاب ہوئیں، ن لیگ کے نیاز احمد، پیپلزپارٹی کے طلحہ محمود اور جےیوآئی کے عطاء الحق جنرل نشستوں جیتے۔
غیر حتمی غیر سرکاری نتائج کے مطابق پی ٹی آئی کے امیدوار مراد سعید جنرل نشست پرجیت گئے، انہیں 26 ووٹ ملے، فیصل جاوید کو 22 اور نورالحق قادری کو 21 ووٹ ملے۔
مرزا آفریدی کو 21 ووٹ ملے۔ خواتین کی 2 نشستوں میں سے ایک پر پی ٹی آئی کی روبینہ ناز اور دوسری پر پیپلزپارٹی کی روبینہ خالد کامیاب ہوئیں۔ غیر حتمی نتیجے کے مطابق خواتین کی نشست پر پی ٹی آئی کی امیدوار روبینہ ناز کو 89 ووٹ ملے ۔ ٹیکنوکریٹس کی نشستوں میں سے ایک پر پی ٹی آئی کے اعظم سواتی اور دوسری پر جےیو آئی کے دلاورخان جیت گئے۔ پی ٹی آئی کے ناراض امیدوار خرم ذیشان کو کوئی ووٹ نہیں پڑا۔ خیال رہے کہ پی ٹی آئی اور اپوزیشن کے درمیان 6 اور 5 کا فارمولہ طے پایا تھا اور اسی تناسب سے دونوں نے نشستیں جیتیں۔
خیبرپختونخوا اور پنجاب میں سینیٹ انتخاب کے نتائج کے بعد پارٹی پوزیشن بدل گئی۔
سینیٹ میں پیپلز پارٹی 26 سینیٹرز کے ساتھ اب بھی سب سے بڑی جماعت کی حیثیت سے برقرار ہے۔ پی ٹی آئی اب سینیٹ کی دوسری بڑی جماعت بن گئی جس کے سینیٹرز کی تعداد 22 ہوگئی۔ مسلم لیگ ن 20 سینیٹرز کے ساتھ سینیٹ میں تیسری بڑی جماعت ہے جبکہ سینیٹ میں بلوچستان عوامی پارٹی کے 4 اور ایم کیو ایم پاکستان کے 3 سینیٹر موجود ہیں ۔نیشنل پارٹی اور پی ایم ایل (ق) کے ایک، ایک سینیٹر سینیٹ کے ممبر ہیں۔سینیٹ میں حکومتی بینچز پر اس وقت 60 ارکان موجود ہیں جن میں 5 آزاد سینیٹرز بھی شامل ہیں۔
سینیٹ میں سنی اتحاد کونسل اور مجلس وحدت مسلمین کا ایک ایک سینیٹر موجود ہے جو اپوزیشن بینچوں پر بیٹھتے ہیں۔ سینیٹ میں اپوزیشن بینچوں پر جے یو آئی کے 7 اور اے این پی کے 3 سینیٹر بھی بیٹھتے ہیں جب کہ ایک آزاد سینیٹر بھی اپوزیشن میں ہیں۔ سینیٹ میں اپوزیشن بینچز پر 35 ارکان موجود ہیں۔سینیٹ میں خیبر پختونخوا سے ثانیہ نشتر کی خالی نشست پر الیکشن ہونا باقی ہے۔
( بشکریہ : جیو نیوز )
فیس بک کمینٹ