لاہور: انسدادِ دہشت گردی عدالت نے نو مئی کے دو مزید کیسز میں پاکستان تحریکِ انصاف کے رہنما میاں محمود الرشید کو مجموعی طور پر 33 برس قید کی سزا سنا دی ہے۔
عدالت نے ڈاکٹر یاسمین راشد، سابق گورنر پنجاب عمر سرفراز چیمہ اور اعجاز چوہدری کو 10، 10 سال قید کی سزا سنائی ہے۔
پی ٹی آئی کے رہنماؤں پر نو مئی کو گلبرک میں گاڑیاں جلانے سمیت جلاؤ گھیراؤ کا مقدمہ بھی درج تھا۔ میاں محمود الرشید کو الگ الگ دفعات کے تحت سزائیں سنائی گئی ہیں۔
عدالت نے جرم ثابت نہ ہونے پر 23 ملزمان کو بری بھِی کیا ہے۔
عدالتی فیصلے میں کہا گیا ہے کہ ڈاکٹر یاسمین راشد، اعجاز چوہدری اور عمر سرفراز چیمہ کی نو مئی کے واقعات میں سازش کے اجلاسوں میں موجودگی ثابت ہوئی ہے۔
پراسیکیوشن کے مطابق ڈاکٹر یاسمین راشد سمیت چار رہنماؤں نے ملک میں جلاؤ گھیراؤ کے لیے عوام میں انتشار پھیلایا۔
فیصلے میں کہا گیا ہے کہ پراسیکیوشن نے مختلف واٹس ایپ پیغامات اور 70 سوشل میڈیا اکاؤنٹس کی تفصیلات فراہم کیں۔ ملزمان کے خلاف فرانزک رپورٹس بھی عدالت میں پیش کی گئیں۔
خیال رہے کہ ان ملزمان کو نو مئی کے متعدد کیسز میں پہلے ہی سزائیں سنائی جا چکی ہیں۔ پاکستان تحریک انصاف انھیں سیاسی بنیادوں پر سنائی گئی سزائیں قرار دیتی رہی ہے۔
( بشکریہ :بی بی سی )
فیس بک کمینٹ