حیدر آباد دکن : آئی سی سی ورلڈکپ کے وارم اپ میچ میں نیوزی لینڈ نے پاکستان کو با آسانی 5 وکٹوں سے شکست دے دی۔نیوزی لینڈ نے پاکستان کا 346 رنز کا ہدف با آسانی 44 ویں اوورمیں حاصل کرلیا، کیویز کے رچن روینڈرا 97 رنز بنا کر نمایاں رہے جبکہ مارک چیپمین 65 رنز بناکر ناٹ آؤٹ رہے۔
اس کےعلاوہ ڈیرل مچل 59 اور کین ولیمسن 54 رنزبناکرریٹائرڈ آؤٹ ہوئے،جمی نیشم نے 33 اور ٹام لیتھم نے 18 رنزبنائے۔پاکستان کے اسامہ میر نے 2، محمد وسیم، سلمان آغا اور حسن علی نے ایک، ایک وکٹ حاصل کی۔
واضح رہے کہ پاکستان نے اپنے پہلے وارم اپ میچ میں نیوزی لینڈ کے خلاف ٹاس جیت کر بیٹنگ کا فیصلہ کیا تھا۔بھارت کے شہر حیدرآباد دکن میں کھیلے گئے وارم اپ میچ میں پاکستان نے مقررہ 50 اوورز میں 5 وکٹوں پر 345 رنز بنائے۔
محمد رضوان 103 رنز بنا کر ریٹائرڈ آؤٹ ہوئے جبکہ بابراعظم نے 80 اور سعود شکیل نے 75 رنز کی اننگز کھیلی، شاداب خان نے 16،عبداللہ شفیق نے 14 اور امام الحق نے ایک رن بنایا۔اس کے علاوہ سلمان آغا 33 اور افتخار احمد 7 رنز بناکر نا قابل شکست رہے۔نیوزی لینڈ کی جانب سے مچل سینٹنر نے 2، لوکی فرگوسن،جمی نیشم اور میٹ ہینری نے ایک ،ایک وکٹ حاصل کی۔
واضح رہے کہ وارم اپ میچ میں تمام 15 کھلاڑی دستیاب تھے، نیوزی لینڈ کے کپتان کین ولیمسن نے میچ کھیل کر اپنی فٹنس کا اندازہ لگایا۔
کین ولیمسن گھٹنے کی سرجری کے بعد ٹیم میں واپس آئے ہیں اس لیے ولیمسن انگلینڈ کے خلاف ورلڈکپ میچ نہیں کھیلیں گے انہوں نے آج پاکستان سے وارم اپ میچ میں صرف بیٹنگ کی۔البتہ جنوبی افریقا کے خلاف وارم اپ میچ میں ولیمسن بیٹنگ کے ساتھ فیلڈنگ بھی کریں گے۔
یاد رہے کہ ورلڈکپ میں پاکستان اپنا پہلا میچ 6 اکتوبر کو نیدرلینڈز کے خلاف کھیلے گا۔اس کے علاوہ جمعہ کو کھیلے گئے ایک اور وارم اپ میچ میں بنگلادیش نے سری لنکا کو 7 وکٹوں سے ہر ادیا۔
سری لنکا نے پہلے کھیلتے ہوئے 49.1 اوور میں 263 رنز بنائے تھے تاہم جواب میں 264 رنز کا ہدف بنگلادیش نے 42 اوورز میں حاصل کرلیا۔
بنگلادیش کے تنزید حسن نے 84 اور لٹن داس 61 رنز بنائے، اس کے علاوہ مہدی حسن 67 اور مشفیق الرحیم نے 35 رنز کی اننگز کھیلی۔سری لنکا کے لہیرو کمارا،ویلالاگے اور ہیمانتھا نے ایک ،ایک وکٹ حاصل کی۔
( بشکریہ : جیو نیوز )
فیس بک کمینٹ