اسلام آباد : وفاقی وزیر برائے مذہبی امور پیر نور الحق قادری نے کہا ہے کہ پاکستانی کرنسی کی قدر میں کمی اور سعودی عرب میں آئے روز ٹیکسز کے نفاذ کی وجہ سے اس برس حج اخراجات مزید بڑھ جائیں گے۔
اسلام آباد میں حج آرگنائزرز ایسوسی ایشن آف پاکستان کے مرکزی و چاروں صوبوں کے نومنتخب عہدیداروں کی حلف برداری تقریب سے خطاب کرتے ہوئے پیر نور الحق قادری کا کہنا تھا کہ ’کاش ہم سستا حج کروا سکتے لیکن سعودی حکومت کے ٹیکسز کی وجہ سے حج اخراجات بڑھائے جا رہے ہیں۔‘
انہوں نے کہا کہ حج اور کرتار پور کے اخراجات کا موازنہ نہیں کیا جا سکتا۔
وفاقی وزیر کا کہنا تھا کہ حج پالیسی2020ء پر کام جاری ہے جس کا جلد اعلان کر دیا جائے گا۔وفاقی وزیر پیر نور الحق قادری نے کہا کہ گزشتہ سال کے مقابلے میں اس برس حج مزید مہنگا ہوگا۔
انہوں نے حج مہنگا اور کرتار پور سستا کی بات کرنے والوں پر بھی شدید تنقید کی اور وضاحت کرتے ہوئے کہا کہ ’حج اور کرتار پور کا موزانہ نہیں کیا جا سکتا، کرتار پور ایک راہ داری ہے جو کہ صرف4 کلو میٹر ہے اور سائیکل کی بجائے پیدل بھی لوگ آتے جاتے ہیں‘ جبکہ حج کے لیے 4 ہزار کلو میٹر سے زائد کا طویل سفر طے کرکے وہاں 40روز قیام و طعام کا اہتمام کرنا پڑتا ہے جس کی وجہ سے اخراجات زیادہ ہیں۔‘
فیس بک کمینٹ