ملتان : کورونا وائرس کے شبہ میں نشتر ہسپتال میں زیر علاج چینی باشندے کے خون کے نمونے اسلام آباد بھجوائے جانے کے بعداس کے قریب رہنے والے تمام افراد کے نمونے بھی حاصل کئے جا رہے ہیں۔ اس سلسلے میں محکمہ صحت کی ٹیمیں ملتان میں واقع چائنیز کیمپ میں پہنچ گئیں اور چینی باشندوں کے علاوہ ان کے ساتھ رہنے والے ڈرائیوروں، مترجم اور باروچی کے بارے میں بھی معلومات جمع کرلی گئیں۔
کیمپ میں رہنے والوں کی نقل و حرکت بھی محدود کردی گئی ہے۔ چین میں دہشت پھیلانے والے کورونا وائرس کے شبہ میں جمعہ کو رات گئے انڈسٹریل اسٹیٹ ملتان سے 40 سالہ چینی باشندے کو نشتر ہسپتال منتقل کیا گیا تھا۔ مریض فانگ فان چند روز قبل چین کے شہر (ووہان) سے واپس لوٹا تھا اور 2 روز سے بخار میں مبتلا تھا جس پر اسے نشتر ہسپتال کے آئی سو لیشن وارڈ منتقل کر کے نمونے گزشتہ روز نیشنل انسٹیٹیوٹ آف اسلام آباد بھجوا دئیے گئے ہیں۔
اس حوالے سے بتایا گیا ہے کہ نیشنل انسٹیٹیوٹ آف اسلام آباد سے یہ نمونے چینی سفارت خانے کے ذریعے تشخیص کے لیے بیروت یا ہانگ کانگ بھجوائے جائیں گے۔ دریں اثناء چین میں پھیلنے والے کورونا وائرس کے شبہ میں نشترہسپتال میں زیرعلاج چینی باشندے کی مکمل دیکھ بھال کی جارہی ہے ۔40سالہ چینی باشندہ آئی سولیشن وارڈمیں زیرعلاج ہے اورتیزی سے صحت یاب ہورہاہے۔ اس سلسلے میں وائس چانسلر نشتر میڈیکل یونیورسٹی پروفیسر ڈاکٹر مصطفی کمال پاشا نے ہفتے کے روز ہنگامی پریس کانفرنس کی اور مذکورہ وائرس سے متعلق آگاہی اور معلومات کے لئے فوکل پرسن بھی نامزد کردیا ہے۔
پروفیسر ڈاکٹر مصطفیٰ کمال پاشا نے کہا کہ فانگ فان کو عام نزلہ زکام اور گلے کی خرابی کے ساتھ نشتر ہسپتال لایا گیا تھا۔ انہوں نے کہا کہ چونکہ متاثرہ شخص حال ہی میں چین سے واپس آیا تھا اسلئے کورونا وائرس کے شبہ میں مریض کو داخل کر کے نمونے اسلام آباد بھجوائیے گئے ہیں۔ تاہم فانگ فان کو گلہ خرابی اور زکام کی ادویات دینے سے افاقہ ہوا ہے اور مریض تیزی سے صحتیابی کی جانب گامزن ہے۔ انہوں نے کہا کہ قوی امکان یہی ہے فانگ فان کورونا وائرس کا شکار نہیں ہے تاہم احتیاطی تدابیر اپناتے ہوئے عالمی ادارہ صحت کی جانب سے جاری گائیڈ لائنز کے مطابق اس کا علاج کیا جا رہا ہے۔ اس حوالے سے نشتر میڈیکل یونیورسٹی و ہسپتال کے شعبہ امراض سینہ کے سربراہ پروفیسر ڈاکٹر انجم نوید جمال کو فوکل پرسن بھی نامزد کر دیا گیا ہے۔
فیس بک کمینٹ