جسٹس اعجاز الاحسن کے گھر پر فائرنگ ۔۔ چیف جسٹس پہنچ گئے : ترجمان سپریم کورٹ

لاہور: سپریم کورٹ آف پاکستان کے جسٹس اعجاز الاحسن کے گھر پر نامعلوم افراد نے مبینہ طور پر فائرنگ کی ہے تاہم اب تک کسی طرح کے نقصان کی اطلاع موصول نہیں ہوئی۔ذرائع کے مطابق جسٹس اعجاز الاحسن کی لاہور میں رہائش گاہ پر گزشتہ رات اور آج صبح فائرنگ کے واقعات پیش آئے۔ترجمان سپریم کورٹ کے مطابق چیف جسٹس آف پاکستان میاں ثاقب نثار نے جسٹس اعجاز الاحسن کے گھر دورہ کیا اور فائرنگ کے واقعے کا جائزہ لیا۔چیف جسٹس نے انسپکٹر جنرل (آئی جی) پنجاب پولیس کو بھی جسٹس اعجاز الاحسن کے گھر پر طلب کرلیا۔خیال رہے کہ جسٹس اعجاز الاحسن نواز شریف اور ان کے اہلِ خانہ کے خلاف کیس پاناما پیپرز کیس کی سماعت کرنے والے پانچ رکنی بینچ کا حصہ ہیں۔جسٹس اعجازالاحسن سپریم کورٹ کی جانب سے پاناما پیپز کیس کے حتمی فیصلے کی روشنی میں قومی احتساب بیورو (نیب) کی جانب سے احتساب عدالت میں دائر ریفرنسز کی کارروائی کے نگراں جج بھی ہیں۔