اسلام آباد : وفاقی حکومت نے پیٹرولیم مصنوعات کی قیمتوں میں رواں ماہ دوسری مرتبہ پھر اضافہ کرتے ہوئے پیٹرول مزید 4 روپے مہنگا کردیا۔خزانہ ڈویژن سے جاری نوٹیفیکشن کے مطابق ‘پیٹرول کی فی لیٹر قیمت میں 4 روپے کا اضافہ کردیا گیا ہے اور نئی قیمت 127 روپے 30 پیسے ہوگی’۔
نوٹیفیکیشن میں کہا گیا ہے کہ ‘ہائی اسپیڈ ڈیزل کی قیمت میں دو روپے، کیروسین کی قیمت میں 7 روپے 5 پیسے اور لائٹ ڈیزل کی فی لیٹر قیمت میں 8 روپے 82 پیسے کا اضافہ کردیا گیا ہے’۔پیٹرولیم مصنوعات کی قیمتوں میں اضافے کے بعد ‘ہائی اسپیڈ ڈیزل کی نئی قیمت فی لیٹر 122 روپے 4 پیسے، کیروسین کی نئی قیمت فی لیٹر 99 روپے 31 پیسے اور لائٹ ڈیزل کی فی لیٹر نئی قیمت 99 روپے 51 پیسے ہوگی’۔خزانہ ڈویژن نے کہا کہ ‘نئی قیمتوں کا اطلاق یکم اکتوبر 2021 سے ہوگا’۔یاد رہے کہ حکومت نے رواں ماہ 15 ستمبر کو بھی پیٹرول کی قیمت میں 5 اور دیگر پیٹرولیم مصنوعات کی فی لیٹر قیمت میں 5 روپے سے زائد کا اضافہ کردیا تھا۔
وزارت خزانہ سے جاری نوٹی فکیشن میں کہا گیا تھا کہ عالمی مارکیٹ میں پیٹرولیم کی قیمتوں میں اتار چڑھاؤ کے باعث 16 ستمبر سے پیٹرولیم مصنوعات کی قیمتوں میں اضافہ کردیا گیا ہے۔نوٹی فکیشن میں بتایا گیا تھا کہ ایک لیٹر پیٹرول کی قیمت میں 5 روپے اضافہ کردیا گیا ہے اور ملکی تاریخ کی بلند ترین نئی قیمت 123 روپے 30 پیسے ہوگی۔وزارت خزانہ نے مزید کہا تھا کہ ہائی اسپیڈ ڈیزل کی قیمت 5 روپے ایک پیسے اضافے کے بعد 120 روپے 4 پیسے، کیروسین کی قیمت میں 5 روپے 46 پیسے اضافے کے بعد 92 روپے 26 فی لیٹر نئی قیمت ہوگی۔
( بشکریہ : ڈان نیوز )
فیس بک کمینٹ