کراچی:اقتصادی بحران کی شکار پاکستان انٹرنیشنل ائیرلائن (پی آئی اے) کے پاس 29 میں سے صرف 15 طیارے آپریشنل ہیں، جس کے باعث قومی ایئرلائن اپنی استعداد کے نصف پر کام کرنے پر مجبور ہے۔
ڈان نیوز ٹی وی کے مطابق طیاروں کے لیے ضروری پارٹس خریدنے کے لیے رقم کی کمی کے باعث پی آئی اے نے اپنے 14 طیاروں کو حال ہی میں گراؤنڈ کردیا ہے۔
پی آئی اے کے آپریشنل جہازوں میں اب 6 بوئنگ ٹرپ سیون وائڈ باڈی ٹوئن انجن، 8 ایئربس اے تھری ٹوینٹی نیرو باڈی جیٹ طیارے اور ایک اے ٹی آر طیارہ شامل ہے۔
دوسری جانب پی آئی اے کے 2 ایئر بس اے تھری ٹوینٹی طیارے گزشتہ 2 برس سے لیز کے تنازع پر انڈونیشیا میں پھنسے ہوئے تھے جس میں سے ایک طیارہ حال ہی میں واپس حاصل کیا گیا ہے۔
ترجمان پی آئی اے نے توقع ظاہر کی ہے کہ لیزنگ کمپنی کے ساتھ بقایا ادائیگیوں کا معاملہ طے ہونے کے بعد رواں ماہ کے آخر تک دوسرا طیارہ بھی واپس حاصل کرلیا جائے گا۔
(بشکریہ: ڈان نیوز)
فیس بک کمینٹ