ہرسال کی طرح 2023 بھی ہمیں بہت سے دکھ دے گیا۔ہم نئے سال میں اپنے دوستوں امجد حیات سدوزئی،حسنین اصغر تبسم اورارشاد امین کے بغیر داخل ہورہے ہیں۔ سال کا آخری دکھ ہمیں نامور شاعر و ماہرتعلیم حبیب الرحمن بٹالوی کی جدائی کی صورت میں ملا۔ان کا 24دسمبر 2023 کو انتقال ہواتھا۔ان دکھوں کے علاوہ اس برس کے دوران عہدساز شاعر، ڈرامہ نگاراوردانشور امجد اسلام امجد بھی ہمیں داغ مفارقت دے گئے۔اس کے علاوہ ہمیشہ کی طرح ان 365دنوں میں کئی نامور سیاسی،سماجی شخصیات، عالمی رہنماء،گلوکار،شاعر اور اداکار بھی ہم سے جدا ہوئے۔آئیں سال کے پہلے روز انہیں یاد کرتے ہیں جن میں سے بہت سی ہستیوں نے گرشتہ برس آج ہی کے دن ہمیں سال نو مبارک کا پیغام بھیجاتھا۔
نیوز کاسٹر مشعال بخاری 3جنوری کو انتقال کرگئیں۔ففٹی ففٹی سے شہرت حاصل کرنے والے اداکار ماجد جہانگیر10جنوری کو رخصت ہوئے۔سابق صدرو آرمی چیف جنرل پرویز مشرف 4فروری کو انتقال کرگئے۔عہدساز شاعر، ڈرامہ نگار، ماہرتعلیم اور مترجم امجد اسلام امجد 10فروری کو اس جہان سے رخصت ہوئے۔نامور ٹی وی کمپیئر،صداکار و اداکار ضیاء محی الدین13فروری کو انتقال کرگئے۔فلم اور ٹی وی کے نامور اداکار اور اندھیرا اجالا سے شہرت حاصل کرنے والے قوی خان 6مارچ کو انتقال کرگئے۔
نامور ٹی وی اداکار و پروڈیوسر طارق جمیل پراچہ9اپریل کو اس دنیا سے رخصت ہوئے۔ٹی وی کے نامور اداکار خالد سعید بٹ 13اپریل کو انتقال کرگئے۔سینئر ٹی وی اداکار شبیررانا 7مئی کو انتقال کرگئے۔معروف دانشور اور فیض احمد فیض کے داماد شعیب ہاشمی 15 مئی کو اس دنیا سے رخصت ہوئے۔نامور ٹی وی اداکار شکیل احمد (انکل عرفی)29جون کوانتقال کرگئے۔عہدساز ناول نگار میلان کنڈیرا 14جولائی کو اس جہان سے رخصت ہوئے۔
پی سی بی کے سابق چیئرمین اعجاز بٹ3اگست انتقال کرگئے۔معروف براڈکاسٹر آصفہ منیر 7اگست کو اس جہان فانی سے رخصت ہوئیں۔جماعت اسلامی کے مرکزی رہنماء اورسیکرٹری اطلاعات کنور محمد صدیق 24 اگست کو انتقال کرگئے۔نیشنل بک فاؤنڈیشن کے ریجنل ڈائریکٹر غلام مرتضی 25اگست کو لاہور میں ٹریفک حادثے میں چل بسے۔شاعر، گیت نگار، سرائیکی دانشور عبدالطیف بھٹی 26اگست کو اس جہان فانی رخصت ہوئے۔
زمبابوے کرکٹ ٹیم کے کپتان ہیتھ سٹریک 3ستمبر کو انتقال کرگئے۔بلوچستان کے انقلابی شاعر مبارک قاضی16ستمبر کو انتقال کرگئے۔نامور ماہر تعلیم اورہمارے بچپن کے دوست امجد حیات سدوزئی 21 ستمبر کو ہمیں داغ مفارقت دے گئے۔پی ٹی وی ملتان کے رپورٹر مزمل حسین جتوئی 30ستمبر کو انتقال کرگئے۔پنجابی کے نامور افسانہ نگار محقق اوردانشورڈاکٹرحنیف چوہدری 5اکتوبر کواس جہان فانی سے رخصت ہوئے۔نامور ماہر قانون و سابق وفاقی وزیر ایس ایم ظفر 19اکتوبر کو رخصت ہوئے۔ڈپٹی ڈائریکٹر تعلقات عامہ ملتان ماجد علی شاہ 20اکتوبر کو انتقال کرگئے۔سابق بھارتی باولر بھشن سنگھ بیدی 23اکتوبر کو انتقال کرگئے۔معروف سماجی رہنماء منزہ ہاشمی 30اکتوبر کو انتقال کرگئیں۔
سرائیکی کے نامورشاعر و صحافی ارشاد امین 5نومبر کو انتقال کرگئے۔سابق وزیر خارجہ گوہر ایوب خان 18نومبر کو اس جہان فانی سے رخصت ہوئے۔پاکستان کے حوالے سے انتہائی متنازعہ،کئی جنگوں میں امریکہ کوجھونکنے کے باوجود امن کا نوبل انعام حاصل کرنے والے ہنری کسنجرکا 30نومبر کو انتقال ہوا۔
نامور صحافی اور روزنامہ امن کے بانی اجمل دہلوی کا یکم دسمبر کو انتقال ہوا۔ کلاسیکی گلوکاراستاد حسین بخش گھلو 5دسمبر کو ہم سے جدا ہوئے۔فرنٹیئر پوسٹ کے ایڈیٹر رحمت شاہ آفریدی کا 10دسمبر کو انتقال ہوا۔نامور ترقی پسند شاعر،مترجم ومحقق احمد سلیم نے 11دسمبر کو داعی اجل کولبیک کہا۔معروف شاعر حسنین اصغر تبسم 20دسمبر کو کبیروالامیں انتقال کرگئے۔ نامور خطاط غلام فرید بھٹی نے 22دسمبر کو جدائی کا صدمہ دیا۔امریتا پریتم کے شوہر امروز 22دسمبر کو رخصت ہوئے۔نامور صحافی تاثیر مصطفی کا 24دسمبر کو انتقال ہوا۔معروف مزاحیہ اداکار نثار قادری 25دسمبر کو اپنے پرستاروں کو اداس کرگئے۔معروف دانشور فراصت بخاری31دسمبر کو جدا ہوئے
فیس بک کمینٹ