رضی الدین رضی ۔۔ہوتل بابا، ہمارا ملتانی ادبی دہشت گرد : ظفر سپل کا تبصرہ

یہ میرے ملتان میں ستر اور اسی کی دہائی کا ذکرہے۔ میں سوچتا ہوں کیسے کیسے نادر روزگار لکھنے والے ملتان کے ادبی منظرنامے پر ایک ساتھ اکھٹے ہوگئے تھے۔ میرے مینٹور جابر علی سید، اور پھرعرش صدیقی، انوار احمد ، ارشد ملتانی، ڈاکٹر امین، اے بی اشرف، انور جمال ، صلاح الدین حیدر، اقبال ارشد، ابن حنیف اور میری گارڈین نوشابہ نرگس۔ نوجوانوں میں سینئر شاعر ممتاز اطہر، پھر جاوید اختر بھٹی، اطہر ناسک، خالد اقبال ، اختر شمار، اظہر مجوکہ، شاکر،قمر رضا شہزاد، نسیم شاہد، ظہیر کمال ،ازرق اور اظہر علی
پھر یہاں ایک ہوٹل تھا، بابا ہوٹل جو ان سب لکھنے پڑھنے والوں کا مسکن تھا اور جس کا سرخیل حیدر گردیزی تھااور اس میں شعروں ، چٹکلوں ، سنسنی خیز خبروں سے شہر میں دھول اڑانے والے اور کانوں کی لوووں کو سرخ کر دینے والی سرگوشیاں کرنے والے کچھ ستم گر، اور اس ساری فضا کی معمولی سے معمولی سرسراہٹ کو خبر بنا کر ہراس پیدا کر دینے والا یہ دہشت گرد ، رضی۔( کتاب کے بیک ٹائٹل پر اس کی جو تصویر ہے وہ اسی زمانے کی ہے اور عینک کے شیشے سے جھانکنے والی آنکھ اسی حوالے کی عکاسی کرتی ہے)۔ بابا ہوٹل کا ہوتل بابا۔
میں نے ملتان کی جن نادر روزگار ہستیوں کا ذکر کیا ہے وہ دبستان ملتان کو ایک بڑے دبستان کی شکل دے سکتے تھے مگر بصورت کمال ایسا نہیں ہوا اور میری نظر میں اس کی صرف ایک وجہ ہے اور وہ ہے ” کسی دوسرےکو مان کر نہ دینا“۔ اسی صفت نے ملتانیوں کو ایک ہنر سے سرفراز کیا اور وہ ہے، جملے کی کاٹ کا ہنر۔ اور پھر یہ ایک ہنر ان کی تمام تخلیقی ہنر مندی پر چھا گیا۔ اسی ایک ہنر نے ان کی آپس کی رنجشوں کو ہوا دی، اسی ایک ہنرمندی نے بابا ہوٹل میں وہ دھول اڑائی کہ الامان، الحفیظ۔ اور اسی دھول میں سے وہ کہانیاں ابھریں، جن کو ہوتل بابا نے رقم کیا۔
پھر یہاں ایک اردو اکادمی تھی، جہاں عالم فاضل جابر علی سید تھے، سنجیدہ طبع عرش صدیقی تھے، شائستہ گو ارشد ملتانی تھے اور شریف النفس ڈاکٹر محمدامین۔ بلاشبہ اردو اکادمی نے لکھنے والوں کی تربیت کی۔ ان میں تخلیق، تنقید اور گفتگو کا ہنر صیقل کیا۔ ان دنوں میں نے بھٹو کی پھانسی کے تناظر میں افسانہ پڑھا: “صداقتوں کا پیمبر”۔ صدارت عرش صدیقی کر رہے تھے۔ یہ ضیا کے زمانے تھے۔ افسانہ ختم ہوا تو عرش صاحب نے صرف ایک فقرہ بولا : اس افسانے پر بات نہیں ہوگی۔ ان کی سنجیدگی اور ڈسپلن ایسا تھا کہ پوری مجلس کو سانپ سونگھ گیا۔ وہ دن تو کیا ، بعد میں بھی اس پر کوئی نہیں بولا۔ مگر وہی جملے کی کاٹ اور فقرہ ضائع نہ کرنے کی آرزو اکادمی میں بھی سر چڑھ کر بولتی رہی۰۰۰ میں نے یہاں باہر سے آنے والے کئی نوآموز سادہ دل مہمانوں کی بھد اڑتی دیکھی۔ اسی جانب ایک کالم میں رضی نے بھی اشارہ کیا ہے۔
رضی پیدائشی صحافی ہے، کسی بھی مصلحت کے آگے سر نہ جھکانے والا، جو دیکھتا ہے ہو بہو دکھانے کے لئے بے چین۔ اور جب اس کو اس کے کسی کارنامے پر داد دی جائے تو اس کا ایک خوبصورت response ہوتا ہے، وہ کہے گا” ہے ناں” اور پھر ایک مخصوص قہقہہ۔ اس کا بنیادی حوالہ شاعری ہے۔ اس نے اپنی پہلی کتاب “ دن بدلیں گے جاناں” سے اپنے سفر کا آغاز کیا اوردوسری کتاب “ستارے مل نہیں سکتے” تک شاعری کے منظرنامے میں اپنی جگہ بنا لی۔