رواں پی ایس ایل پاکستان کرکٹ کے لیے ستم ظریفی کا سامان رہی ہے کہ دونوں فارمیٹس کے کپتانوں کی ٹیمیں ٹیبل کے نچلے خانوں میں لڑھک رہی ہیں اور دونوں کپتانوں کی اپنی فارم بھی دگرگوں ہوئی جاتی ہے۔
قلندرز اپنی حالیہ فارم سے ماضی کے ناگفتہ بہ سیزنز کی یادیں تازہ کر رہے ہیں جبکہ کنگز اپنے گزشتہ سیزن کے عین مطابق ابھی تک ناقص فیصلہ سازی اور ابتر فارم کا بوجھ اٹھا رہے ہیں۔
شیکسپیئر نے جو کہا تھا کہ ’نام میں کیا رکھا ہے‘ تو کراچی کنگز بھی نہ صرف شیکسپیئر کے اس مقولے کی لاج نبھا رہے ہیں بلکہ بڑھ چڑھ کر اس کی حقانیت ثابت کرنے پہ تُلے ہیں۔
گو کہنے کو یہ کنگز ہیں مگر ان ’بادشاہوں‘ کی پرفارمنس بھی مغل بادشاہت کے اختتامی دنوں کی یاد دلا رہی ہے اور خدشہ ہے کہ اگر حالات میں کوئی بڑی کایا کلپ نہ ہوئی تو کنگز ایک اور ایڈیشن کے فائنل فور کی دوڑ سے محروم رہ جائیں گے۔
پہلے ہی میچ میں ملتان سلطانز سے شکست کا مارجن اس قدر بھاری رہا کہ اب رن ریٹ کراچی کنگز کے لیے ایک الگ دقت بن چکا ہے۔ اب نہ صرف باقی ماندہ میچز جیتنے ضروری ہو رہے ہیں بلکہ فتوحات میں کچھ ایسا مارجن بھی درکار ہو گا جو ٹیبل میں کراچی کی پوزیشن کچھ بہتر کر سکے اور وہ سیزن کے آخری مرحلے تک رسائی حاصل کر پائیں۔
بیٹنگ میں حد درجہ پرانے اور آزمودہ مہروں پہ انحصار کراچی کو بھاری پڑا ہے۔
شعیب ملک گو ربع صدی سے کھیل رہے ہیں اور یہ ان کی صحت مندی کی دلیل تو ہو سکتی ہے مگر عظمت کا ثبوت قطعاً نہیں ہے کہ حالیہ سیزن بھی ان کی مجموعی کارکردگی اوسط ہی رہی ہے۔
جیمز ونس بھی تاحال کوئی ایسی اننگز کھیلنے میں ناکام رہے ہیں جو شان مسعود کی پریشانیاں کم کر پائے۔ خود شان بھی بطور قائد اپنی ٹیم کے لیے کوئی مثالی کارکردگی دکھانے میں ناکام رہے ہیں۔
ان حالات میں سارا بوجھ آن کر کائرن پولارڈ پہ گر پڑتا ہے جو بذاتِ خود اپنے کرئیر کے اختتام پر ہیں اور اگرچہ حالیہ میچز میں عرفان نیازی کے ہمراہ ساجھے داری سے انھوں نے کراچی کے سکور بورڈز کا کچھ بھرم تو بحال کیا ہے مگر فتح کے حصول میں وہ ناکافی رہا ہے۔
بجائے خود یہ پی ایس ایل کے لیے بھی کوئی نیک شگون نہیں کہ لاہور اور کراچی جیسی دو بڑی فرنچائزز ٹیبل کے پست ترین خانوں میں گری پڑی ہیں۔ چونکہ پاکستان کی بیشتر قومی کرکٹ بھی ان دونوں شہروں کی باہمی ساجھے داری اور رقابت کے بل پہ چلتی ہے سو ان دونوں کی حالیہ کارکردگی نے پی ایس ایل کے رواں سیزن کی رونقیں بھی گہنا دی ہیں۔
اگرچہ کنگز نے ملتان سلطانز کے سابقہ سٹریٹیجی ڈائریکٹر حیدر اظہر کی خدمات حاصل کر کے اپنی قسمت بدلنے کی کوشش کی ہے مگر تاحال یہ کوشش بھی ثمر آور نہیں ہو پائی کیونکہ نصف سیزن کھیل جانے کے بعد بھی کنگز اپنی بہترین الیون طے نہیں کر پائے۔
گو سیکھنے کو ملتان سلطانز کی مثال ہی مشعلِ راہ ہو سکتی ہے کہ بہت بڑے ناموں کے بغیر اس فرنچائز نے خالصتاً کارکردگی کے بل پہ ایک موثر کمبینیشن تشکیل دیا ہے جسے محمد رضوان جیسے زیرک دماغ اور متحمل مزاج کپتان کی سرپرستی میسر ہے۔
زلمی اوائل کی مشکلات کے بعد اب نسبتاً بہتر شکل میں ٹائٹل کے لیے دوڑ رہی ہے اور بابر اعظم و صائم ایوب کی زریں فارم بھی نہ صرف اپنی فرنچائز بلکہ پاکستان کے لیے بھی نیک شگون ہے کہ دو ماہ بعد کے ٹی ٹونٹی ورلڈ کپ میں یہ پاکستان کے لیے ایک اثاثہ ثابت ہو سکتے ہیں۔
یونائیٹڈ نے شروع کے بے تحاشہ تجربات کے بعد پچھلے میچ میں کامیابی حاصل کر کے اپنے جمود کو توڑا ہے لیکن اگر شاداب خان اپنی قیادت میں پہلے ٹائٹل کی جیت پہ مرکوز ہیں تو سلیکشن میں تسلسل کے علاوہ کولن منرو کی فارم بھی کلیدی اہمیت کی حامل ہو گی۔
اُدھر قلندرز کا قصہ تو اب لگ بھگ تمام ہوا چاہتا ہے کہ اگر کوئی بہت بڑی انہونی نہ ہوئی تو ان کے لیے ٹیبل کے پست ترین خانے سے نکل پانا ہی غنیمت ہو گا۔ لیکن کراچی کے ابھی پانچ میچز باقی ہیں اور اگر بہتر کمبینیشن کے ساتھ ساتھ شان مسعود کی اپنی بیٹنگ فارم میں بھی بہتری آ گئی تو کنگز کی کایا پلٹ بھی سکتی ہے۔
(بشکریہ: بی بی سی اردو)
فیس بک کمینٹ