لاہور : صوبہ پنجاب میں 7 جون سے اسکول کھولنے کا اعلان کردیا گیا۔ وفاقی وزیر منصوبہ بندی اسد عمر اسد کا اپنے ایک بیان میں کہنا ہے کہ نیشنل کمانڈ اینڈ آپریشن سینٹڑ( این سی او سی) کورونا پرقابو پانے کے لئے انتھک کوششوں کو جاری رکھے ہوئے ہے ، جب تک قوم اس کورونا سے محفوظ نہ ہوجائے کوشش کو جاری رکھیں گے۔
ذرائع کے مطابق میٹرک اور انٹر کے سالانہ امتحانات 23 جون سے 29 جولائی تک ہوں گے جبکہ 34 اضلاع میں 31 مئی سے تمام کالجز بھی کھول دیے جائیں گے۔ دوسری جانب ایس اوپیزکےتحت تفریحی پارکس کھولنے اور واٹراسپورٹس کی اجازت دینےکا بھی فیصلہ کیا گیا ہے، شاپنگ مالزمیں فوڈکورٹس کوبھی ایس اوپیزکےتحت کھولنےکی اجازت دی جائے گی
ادھر فیض آباد کے مقام پر آن لائن امتحانات کے لیے احتجاج کرنے والے درجنوں طلبہ کو گرفتار اور بے شمار موٹرسائیکلز پولیس نے اپنے قبضے لے لیں۔ ڈان اخبار کی رپورٹ کے مطابق کیپیٹل ایڈمنسٹریشن اور پولیس حکام کا کہنا تھا کہ فیض آباد پل پر راولپنڈی اور اسلام آباد سے تعلق رکھنے والے میٹرک اور انٹر کے طلبہ دوپہر میں جمع ہونا شروع ہوئے۔ جیسے ہی طلبہ کی تعداد 600 سے 700 ہوئی انہوں نے اسلام آباد ایکسپریس وے بلاک کردی۔
احتجاج کرنے والے طلبہ مطالبہ کررہے تھے کہ ان کہ سالانہ امتحانات آن لائن لیے جائیں، انہوں نے حکومت، وفاقی وزیر تعلیم اور محکمہ تعلیم کے دیگر افسران کے خلاف نعرے بازی کی۔ کیپیٹل ایڈمنسٹریشن اور پولیس کے سینئر افسران نے احتجاج کرنے والے طلبہ کے ساتھ مذاکرات کیے۔ احتجاجی طلبہ نے عہدیداران کو کہا کہ انہیں نیشنل پریس کلب (این پی سی) تک مارچ کر کے وہاں احتجاج کرنے کی اجازت جائے۔
ایڈمنسٹریشن نے طلبہ کو پریس کلب تک جانے کی اجازت دی لیکن اس مذاکرات کے درمیان احتجاج کرنے والے چند طلبہ مشتعل ہوگئے۔
بعدازاں طلبہ نے نجی گاڑیوں کو نقصان پہنچانا شروع کردیا اور ان گاڑیوں کے ڈرائیورز کو بھی زخمی کیا جس کے جواب میں پولیس نے احتجاج کرنے والوں کو منتشر کرنے کے لیے لاٹھی چارج کیا۔ جواب میں طلبہ نے پولیس پر پتھر برسائے جس پر پولیس نے آنسو گیس کے شیل فائر کیے اور درجنوں طلبہ کو حراست میں لے لیا۔ ساتھ ہی جائے وقوع پر موجود متعدد موٹر سائیکلز کو بھی اپنے قبضے میں لے لیا جنہیں گرفتار طلبہ سمیت مختلف پولیس اسٹیشنز پہنچا دیا گیا۔ حکام کا کہنا تھا کہ تفتیش کے دوران حراست میں لیے گئے افراد اس بات کا ثبوت دینے میں ناکام رہے کہ وہ طالبعلم ہیں اور کسی تعلیمی ادارے میں اینرولڈ ہیں۔
حکام نے مزید کہا کہ یہ بظاہر شرپسند معلوم ہوتے ہیں جنہوں نے امن و عامہ کی صورتحال خراب کرنے کے لیے طلبہ کے احتجاج میں شرکت کی۔
فیض آباد پر طلبہ کے احتجاج کی وجہ سے ایکسپریس وے اور دیگر سڑکوں پر ٹریفک پھنس گیا اور مسافروں کو سخت مشکل کا سامنا کرنا پڑا۔ایک کار سوار مسافر نوید احمد کا کہنا تھا کہ ‘مری روڈ کی بندش کی وجہ سے مجھے راجا بازار سے گزر کر تنگ گلیوں میں جانا پڑا لیکن وہاں بھی راستے بند تھے اس کی وجہ سے میرا وقت اور ایندھن ضائع ہوا’۔اسی طرح ڈبل روڈ کے رہائشی محمد نیاز نے کہا کہ سڑک پر گاڑیون کی طویل قطاریں لگی ہوئی تھیں۔
ان کا کہنا تھا کہ جڑواں شہروں کے شہریوں کی اکثریت کام سے واپس آنے کے لیے سہ پہر میں ڈبل روڈ ا استعمال کرتی ہے۔