لاہور سےکراچی جانے والی شالیمار ایکسپریس شاہدرہ پل پر حادثے کا شکار ہوگئی۔
ریسکیو ذرائع کے مطابق شالیمار ایکسپریس کی 3 بوگیاں پٹری سے اترگئیں جس وجہ سے ٹریک پر ٹرینوں کی آمدورفت معطل ہوگئی جب کہ حادثے کی اطلاع ملتے ہی ریلوے اور ریسکیو ٹیمیں جائے حادثہ پر پہنچ گئیں۔
ترجمان ریلوے نے بتایا کہ شالیمار ایکسپیریس کراچی جانےکیلئے لاہور سے صبح ساڑھے7 بجے روانہ ہوئی تھی، ڈی ٹریک ہونے والی تینوں کوچز میں سوار تمام مسافر محفوظ ہیں جب کہ سی ای او ریلوے عامر علی بلوچ نے حادثے کی تحقیقات کا حکم دیا ہے۔
ترجمان کے مطابق ریلوے ٹریک صاف کرنے کے لیے ریلیف ٹرین لاہور سے روانہ ہوگئی ہے، کراچی سےلاہور جانے والی قراقرم ایکسپریس کو شیخوپورہ ریلوے اسٹیشن پرروک لیا گیا ہے جب کہ قراقرم ایکسپریس سانگلہ ہل سے براستہ وزیرآباد لاہورپہنچےگی۔
ترجمان نے مزید بتایا کہ متاثرہ ٹرین کے تمام مسافروں کو ریلوے اسٹیشن شاہدرہ پہنچا دیا گیا، متاثرہ ٹرین کے مسافروں کو ریلیف ٹرین کے ذریعے لاہور ریلوے اسٹیشن پہنچایا جائےگا جب کہ لاہور سے ایک دوسری شالیمار ایکسپریس ٹرین ان مسافروں کو کراچی لے کر جائے گی۔
(بشکریہ:ایکسپریس نیوز)
فیس بک کمینٹ