اسلام آباد : انسداد دہشت گردی عدالت نے اشتعال انگیزی اور تشدد پر اکسانے کے مقدمے میں اشتہاری ہونے پر یوٹیوبر عادل راجہ، شاہین صہبائی، معید پیرزادہ، صابر شاکر، حیدر مہدی اور وجاہت ایس خان کی جائیدادیں ضبط اور شناختی کارڈ بلاک کرنے کا حکم دے دیا ہے۔انسداد دہشت گردی عدالت کے جج طاہر عباس سپرا نے تحریری احکامات جاری کرتے ہوئے ڈپٹی کمشنر اسلام آباد کو اشتہاری ملزمان یوٹیوبر عادل راجہ، شاہین صہبائی، میعد پیر زادہ، صابر شاکر، حیدر مہدی اور وجاہت ایس خان کی منقولہ اور غیر منقولہ جائیدادیں قرق کرنے کا حکم دیا۔
عدالت نے چیئرمین نادرا کو ملزمان کے شناختی کارڈ اور نائیکوپ جبکہ ایف آئی اے کے ڈی جی کو ملزمان کے پاسپورٹ بلاک کرنے کا بھی حکم دیا۔عدالت نے احکامات پر عملدرآمد کی رپورٹ 15 دن میں طلب کرلی۔ملزمان کے خلاف استغاثہ کے گواہان کے بیانات قلمبند بھی کرلیے گئے ہیں۔
انسداد دہشتگردی کی عدالت نے دس جولائی تک تمام متعلقہ محکموں کو عملدرآمد رپورٹ جمع کروانے کی ہدایت کی ہے۔واضح رہے کہ عادل راجہ، شاہین صہبائی، معید پیرزادہ، صابر شاکر، حیدر مہدی اور وجاہت ایس خان کے خلاف اشتعال انگیزی اور لوگوں کو تشدد پر اکسانے کے الزام کے مقدمات درج ہیں۔
فیس بک کمینٹ