شاہ محمود قریشی کی نااہلی کی صورت میں مہر بانو الیکشن لڑیں گی ؟ سینئر صحافی مظہر جاوید کا تجزیہ

ملتان : الیکشن کمیشن کی جانب سے چند روز میں انتخابی شیڈول کا با ضابطہ اعلان ہونے والا ہے جبکہ سیاسی جماعتیں اپنی اپنی جگہ متحرک ہیں ذرائع کے مطابق تحریک انصاف کے ٹکٹ کے لئے پارٹی کی جانب سے ملتان میں بیشتر امیدواروں سے رابطہ ہوا ہے مگر ایک دو امیدواروں نے تو الیکشن کے لیے پی ٹی آئی کا ٹکٹ لینے سے صاف انکار کر دیا ہے البتہ آنے والے دنوں میں پی ٹی آئی کے امیدواروں کی فہرست سامنے آ سکتی ہے۔
ادھر این اے 150 سے جو کہ 2018 کے الیکشن میں مخدوم شاہ محمود قریشی کا حلقہ تھا اب بھی تحریک انصاف کے امیدوار مخدوم شاہ محمود قریشی ہی ہوں گے جبکہ ان کی کورننگ امیدوار ان کی صاحبزادی مہر بانو قریشی بھی امیدوار کے طور پر سامنے آئیں گی قانونی ماہرین کے مطابق اگر مخدوم شاہ محمود قریشی کو سزا بھی ہو گئی تب بھی وہ امیدوار رہ سکتے ہیں البتہ نا اہلی کی صورت میں مخدوم شاہ محمود قریشی امیدوار نہیں بن سکتے ایسی صورت میں ان کی جگہ مہر بانو قریشی امید وار ہوں گی تحریک انصاف کے امید وار کے مقابلہ کے لئے وزیر اعلیٰ کے سابق مشیر و مخدوم شاہ محمود قریشی کے قریبی ساتھی حاجی جاوید اختر انصاری نے بھی ایم این اے کا الیکشن لڑنے کا اعلان کر دیا ہے واضح رہے کہ حاجی جاوید اختر انصاری جتنے ووٹ ایم پی اے کی حثیت سے لیتے رہے اتنے ووٹ ان کے حلقہ سے شاہ محمود قریشی کو ملتے تھے اب حاجی جاوید انصاری مطمئن ہیں کہ انہیں ن لیگ کا ٹکٹ ملے گا مگر ان کا کہنا ہے کہ وہ ہر حالت میں این اے 150 سے ایم این اے کا الیکشن لڑیں گے۔
یہ بات قابل ذکر ہے کہ اس وقت تک استحکام پاکستان پارٹی اور پاکستان پیپلز پارٹی کے پاس این اے 150 میں کوئی امیدوار نہیں ہے اگرچہ سابق وفاقی وزیر مخدوم سید تنویر الحسن گیلانی بھی ایسی حلقہ سے امیدوار کی حیثیت سے سامنے آ رہے ہیں مگر وہ آزاد لڑیں گے یا کسی پاٹی سے اس کا ابھی تک فیصلہ سامنے نہیں آیا تحریک لبیک کے امیدوار محمد حسین بابر ایڈووکیٹ اس وقت مضبوط امیدوار ہیں وہ انتخابی مہم میں سب سے آگے ہیں انہیں مذہبی حلقوں خاص طور پر جمعت علما پاکستان اور نظام مصطفی پارٹی کی بھر پور حمایت حاصل ہے۔اس وقت این اے 150 میں مسلم لیگ ن کے ٹکٹ کے حصول کی دوڑ میں سب سے زیادہ امیدوار موجود ہیں اور ان میں سے بیشتر امیدواروں نے کافی عرصہ خاموش رہنے کے بعد انتخابی مہم شروع کر دی ہے اور کافی امیدوار ٹکٹ کے لئے مطمئن ہیں ان امیدواروں میں موجود سینیٹر رانا محمودالحسن ۔سابق ٹکٹ ہولڈر عامر سعید انصاری ۔تحر یک انصاف سے علیحدہ ہونے والے حاجی جاوید اختر انصاری اور چوہدری عبد الوحید ارائیں شامل ہیں یہ تمام امید وار انتخابی مہم کے لئے پارٹی ٹکٹ کا انتظار کر رہے ہیں لیکن حاجی جاوید اختر انصاری نے چونکہ ہر حالت میں ایم این اے کا الیکشن لڑنا ہے اس لئے ان کی انتخابی مہم دیگر امیدواروں کے مقابلہ میں کچھ زیادہ ہے باقی امیدواروں کے ڈیرے آباد ہیں تاہم الیکشن شیڈول کا اعلان ہوتے ہی بہت سے آزاد امیدوار بھی سامنے آنے کا امکان ہے