ریڈیو،ٹی وی اورسٹیج کے نامورنامورگلوکارنعیم الحسن ببلوانتقال کرگئے

ملتان:ریڈیو،ٹی وی اورسٹیج کے نامورگلوکارنعیم الحسن ببلواتوارکے روزملتان میں انتقال کرگئے ،ان کی عمر63سال تھی ۔نعیم الحسن ببلوجگرکے عارضہ کاشکارتھے ۔ان کاشمار ملتان میں پاپ میوزک متعارف کرانے والوں میں ہوتاتھا۔انہوں نے 80کے عشرے میں پاپ بینڈ”میرا”گروپ کی بنیادرکھی جس میں ان کے ساتھ جاویدباری ،مختارباری اورڈگلس جیری بھی شامل تھے ۔وہ کلاسیکل غزل ،گیت اورپاپ پربھرپورعبوررکھتے تھے ۔
نعیم الحسن ببلو کابنیادی تعلق مظفرگڑھ سے تھا۔ انہوں نے گورنمنٹ مسلم ہائی سکول ملتان سے میٹرک کیا۔اورگریجویشن کے بعد بینکنگ کے شعبہ سے وابستہ ہوئے ۔نعیم الحسن ببلونے انگلینڈ،ناروے ،متحدہ عرب امارات میں بھی بہت سے پروگراموں میں شرکت کی ۔وہ زکریایونیورسٹی کے شعبہ موسیقی اورملتان آرٹس کونسل میں موسیقی کی تعلیم دیتے رہے ۔نامورگلوکارہ ثریاملتانیکراورراحت ملتانیکرنے نعیم الحسن ببلو کے انتقال پرگہرے دکھ اورصدمے کااظہارکیاہے اورکہاہے کہ ان کی وفات سرائیکی خطے کے لئے ایک بڑانقصان ہے ۔
ریڈیوپاکستان ملتان کی سٹیشن ڈائریکٹرکوثرثمرین نے کہاکہ ملتان میں موسیقی کاایک خوبصورت ختم ہوگیا،وہ بہت باصلاحیت گلوکارتھے لیکن وہ ناقدری کاشکارہوئے ۔ناموربراڈکاسٹرکنٹرولرسنٹرل پروڈکشنزاسلام آبادآصف خان کھیتران نے کہاکہ ہم ایک بڑے آدمی سے محروم ہوگئے ۔معروف صحافی ناصرمحمودشیخ نے کہاکہ نعیم الحسن ببلو میرے استادتھے وہ کافی عرصہ سے ڈپریشن کاشکارتھے ،موسیقی ان کااوڑھنابچھوناتھا،انہیں معاشی تنگدستی کی وجہ سے اپنا گھربھی فروخت کرناپڑگیاتھا۔