اسلام آباد : پاکستان میں کورونا وائرس کی پانچویں لہر کے دوران اومیکرون کے پھیلاؤ کے سبب کیسز میں غیر معمولی اضافہ دیکھا جارہا ہے اور گزشتہ گھنٹوں کے دوران 8 ہزار 183 کیسز رپورٹ ہوئے جو اب تک کی سب سے بڑی تعداد ہے۔
اس کے ساتھ ہی ملک میں وائرس کے مصدقہ کیسز کی مجموعی تعداد بھی 14 لاکھ 2 ہزار 70 تک پہنچ گئی ہے۔کیسز کی ریکارڈ تعداد کے علاوہ گزشتہ 24 گھنٹوں میں کووڈ 19 کے مزید 30 مریض زندگی کی بازی ہار گئے جس سے اموات کی مجموعی تعداد 29 ہزار 192 ہوگئی۔
اس سے قبل وبا کے سب سے زیادہ کیس 21 جنوری کو رپورٹ ہوئے تھے جن کی تعداد 7 ہزار 678 تھی۔
نیشنل کمانڈ اینڈ آپریشن سینٹر کے مطابق گزشتہ 24 گھنٹوں میں 68 ہزار 624 ٹیسٹس کیے گئے، جن کے نتیجے میں کیسز مثبت آنے کی شرح 11.92 فیصد رہی۔کیسز میں ریکارڈ اضافے کے ساتھ ہی ملک میں فعال کیسز کی تعداد بھی 98 ہزار 221 تک پہنچ گئی ہے، جس میں سے ایک ہزار 353 مریضوں کی حالت تشویشناک ہے۔گزشتہ 24 گھنٹوں کے دوران ملک کے مختلف حصوں میں کورونا کیسز اور اموات کی صورتحال کچھ اس طرح ہے
پنجاب: 2 ہزار 385 کیسز، 6 اموات
سندھ: 2 ہزار 469 کیسز، 20 اموات
خیبرپختونخوا: ایک ہزار 317 کیسز، 3 اموات
بلوچستان: 56 کیسز
اسلام آباد: ایک ہزار 550 کیسز
گلگت بلتستان: 25 کیسز، ایک موت
آزاد کشمیر: 383 کیسز
علاوہ ازیں ملک میں مزید ایک ہزار 786 مریض صحتیاب بھی ہوئے، یوں صحتیاب افراد کی مجموعی تعداد 12 لاکھ 74 ہزار 657 تک پہنچ گئیں۔
خیال رہے کہ ملک میں وبا کا پھیلاؤ تقریباً کنٹرول ہوگیا تھا تاہم وائرس کی نئی قسم اومیکرون سامنے آنے کے بعد دسمبر کے اواخر سے کیسز میں تیزی سے اضافے کا سلسلہ جاری ہے جسے وبا کی پانچویں لہر قرار دیا گیا ہے۔
اگر وبا کی مختلف لہروں کے دوران سب سے زیادہ کیسز دیکھے جائیں تو اس سے قبل سب سے زیادہ کیسز 13 جون 2020 کو رپورٹ ہوئے تھے جن کی تعداد 6 ہزار 825 تھی۔وبا کی دوسری لہر میں سب سے زیادہ کیسز 6 دسمبر 2020 کو سامنے آئے جو 3 ہزار 795 تھے۔اسی طرح تیسری لہر کے دوران 17 اپریل 2021 کو کیسز کی بلند ترین تعداد 6 ہزار 127 ریکارڈ کی گئی۔
چوتھی لہر میں سب سے زیادہ کیسز 4 اگست 2021 کو رپورٹ ہوئے تھے جو 5 ہزار 661 تھے۔
( بشکریہ : ڈان نیوز )
فیس بک کمینٹ