اسلام آباد : وزیر اعظم پاکستان اور مسلم لیگ (ن) کے صدر شہباز شریف ایک بار پھر کورونا وائرس سے متاثر ہوگئے۔جس کے بعد انہوں نے تمام سرگرمیاں منسوخ کر دی ہیں ۔وفاقی وزیر اطلاعات و نشریات مریم اورنگزیب نے سماجی رابطے کی ویب سائٹ ٹوئٹر پر جاری اپنے ایک بیان میں بتایا کہ وزیراعظم شہباز شریف کورونا کا شکار ہوگئے ہیں، ان کی طبیعت 2 روز سے ناساز تھی۔
انہوں نے بتایا کہ ڈاکٹر کے مشورے سے آج کورونا ٹیسٹ کروایا گیا جس کی رپورٹ مثبت آئی۔مریم اورنگزیب نے کہا کہ عوام اور کارکنان سے وزیر اعظم کی جلد صحت یابی کی دعا کی اپیل ہے۔
واضح رہے کہ اس سے قبل بھی 2 مرتبہ شہباز شریف کورونا وائرس سے متاثر ہوچکے ہیں، یہ تیسرا موقع ہے جب وزیر اعظم کا وائرس کا ٹیسٹ مثبت آیا ہے، اس سے قبل رواں سال جنوری اور جون 2020 میں کورونا وائرس سے متاثر ہوئے تھے۔
یاد رہے کہ وزیراعظم شہباز شریف چند روز قبل لندن گئے تھے اور انہیں 11 نومبر کو واپس پاکستان کے لیے روانہ ہونا تھا، تاہم طبیعت خرابی کے سبب انہوں نے اپنا قیام 2 روز کے لیے بڑھا دیا تھا اور وہ گزشتہ روز ہی وطن پہنچے تھے۔
صدر مملکت ڈاکٹر عارف علوی نے وزیراعظم شہباز شریف کا کورونا ٹیسٹ مثبت آنے پر ان کیلئے جلد صحتیابی کی دعاکی ہے۔ایوان صدر سے جاری بیان کے مطابق صدر مملکت نے وزیراعظم کی صحت کے لیے نیک تمناؤں کا اظہار کیا۔
ڈاکٹر عارف علوی نے کہا ہے کہ کورونا کے دوران احتیاط کریں، انہوں نے دعاکی کہ اللہ تعالیٰ آپ کو جلد صحت کاملہ عطا فرمائے۔دوسری جانب، اسپیکرقومی اسمبلی راجا پرویز اشرف اور ڈپٹی اسپیکر زاہد اکرم درانی نے وزیراعظم شہباز شریف کی کورونا سے جلد صحت یابی کی دعا کرتے ہوئے ان کے لئے نیک خواہشات کا اظہارکیا۔انہوں نے اپنے الگ الگ جاری پیغامات میں کہا کہ پوری قوم وزیراعظم کی جلد صحت یابی کےلئے دعا گو ہے، انہوں نے دعا کی کہ اللہ تعالیٰ جلد ازجلد انہیں اس مرض سے شفایاب کر ے تاکہ وہ ملک کی ترقی اور خوشحالی کے لئے اپنی کاوشیں جاری رکھ سکیں۔ادھر سینئر صحافی حامد میر نے بھی ٹوئٹر پر لکھا کہ اللّٰہ تعالیٰ شہباز شریف صاحب کو جلدازجلد صحت یاب کرے۔
( بشکریہ : ڈان نیوز )
فیس بک کمینٹ