عابد رشید نےدیارغیر میں اردو کے فروغ کے لیے گراں قدرخدمات انجام دیں ۔قمر رضا شہزاد

ملتان(اے پی پی):نامورشاعر،دانشور،شکاگو سخن ور اور حریم نعت شکاگو کے روح رواں عابد رشید نے کہا ہے کہ دبستان ملتان کی ایک اپنی پہچان ہے۔میں نے دنیا بھر میں سفر کیا لیکن ملتان کے شاعروں کالہجہ منفرد اور توانا ہے۔
ان خیالات کااظہار انہوں نے ملتان آرٹس کونسل کی ادبی بیٹھک میں سخن ورفورم کے زیراہتمام اپنے اعزاز میں منعقدہ تقریب سے خطاب کے دوران کیا۔ تقریب کے مہمان خصوصی قمررضا شہزاداورمہمان اعزاز رضی الدین رضی تھے۔نظامت کے فرائض شاکر حسین شاکر نے انجام دیئے۔
تقریب سے خطاب کرتے ہوئے قمررضا شہزاد نے کہاکہ عابد رشید شکاگو میں پاکستان کی آٰواز ہیں۔ عابد رشید نے دیارغیر میں اردو شعروادب کے فروغ کے لیے گراں قدر خدمات انجام دیں۔ شاکر حسین شاکر نے کہاکہ نعت اور غزل میں ان کا منفردمقام ہے۔رضی الدین رضی نے کہاکہ بیرونی ممالک سے آنے والے شعراء میں ہمیں بہت کم لوگ متاثر کرتے ہیں۔ عابد رشید بے شک شکاگو میں رہتے ہیں لیکن ان کی جڑیں اپنے وطن میں ہیں۔ان کی شاعری میں ہمارے عہد کے دکھ دکھائی دیتے ہیں۔
بعد ازاں شعری نشست منعقد ہوئی جس میں مستحسن خیال، سہیل عابدی، مختارعلی، مبشر سعید، راؤ وحید اسد، شہناز نقوی،ڈاکٹر شکیل پتافی، احمد مسعودقریشی، کیف صحرائی،کومل جوئیہ، شازیہ رباب، فیضا ن احمد فیضی اور ندیم بلال حاشر نے کلام سنایا۔اس موقع پرمہمان شاعر کو تحائف پیش کیے گئے جبکہ عابد رشید نے اپنا نعتیہ مجموعہ”بعد ازخدا“ مہمانوں میں تقسیم کیا۔