ملتان : نامور شاعر ،دانش ور اور ماہر تعلیم ڈاکٹر محمد امین نے کہاہے کہ کتاب کے ساتھ دوستی ہمیں تاریخ اور ثقافت کے ساتھ جوڑتی ہے اور جو قومیں کتاب سے دور ہو جائیں وہاں جرائم اور بے اطمینانی بڑھ جاتی ہے ۔کتاب دوستی قوموں کی ترقی میں معاون ثابت ہوتی ہے ۔
ان خیالات کا اظہار انہوں نے گردوپیش پبلی کیشنزاور اکادمی ادبیات پاکستان ملتان کے زیر اہتمام کتابوں کے قومی دن کے موقع پر ریڈیو پاکستان ملتان کے سیمینار روم میں اپنی 40کتابوں کی نمائش کے موقع پر خطاب کے دورن کیا۔پاکستان میں یہ اپنی نوعیت کی پہلی تقریب تھی جس میں ایک ہی مصنف کی کتابیں نمائش کے لیے رکھی گئیں ۔ان میں شعری مجموعے بھی شامل تھے ،جاپانی ،اردو ڈکشنریاں ،فلسفے اور تحقیق کی کتابیں اور دیگر مطبوعات بھی موجود تھیں تقریب کا افتتاح زکریا یونیورسٹی علی انصاری نے کیا ۔
تقریب کے میزبان رضی الدین رضی اور اظہر سلیم مجوکہ تھے جبکہ سٹیشن ڈائریکٹر ریڈیو پاکستان ملتان فخر عباس ، اور سینئرصحافی مسیح اللہ جام پوری مہمان خصوصی کے طور پر شریک ہوئے ۔ ڈاکٹر محمد امین نے مزید کہا کہ میں نے اپنی ساری عمر محنت کے ساتھ گزاری کسی عہدے یا منصب کے حصول کے لیے کوشش یا سازش نہیں کی اور مجھ پر ہمیشہ راہیں کھلتی گئیں۔میں نے جو کچھ بھی حاصل کیا وہ میرے استاد کی دعاؤں کا نتیجہ ہے ،میں اگر چہ پاکستان میں ہائیکو کے بانی کی حیثیت سے جاناجاتا ہوں اور یہی میری بنیادی شناخت بنی لیکن اس کے ساتھ ساتھ میں نے فلسفے ،تنقید اور تحقیق کے علاوہ تراجم بھی کیے ۔ جاپان کی حکومت نے میری خدمات کے اعتراف میں اپنا سب سے بڑا قومی اعزازدیاجو در اصل شاہی ایوارڈ ہے۔تقریب میں مشعل سیف ، مخدوم اکبر ہاشمی ، عمران گردیزی ، خواجہ حبیب ، ڈاکٹر شوذب کاظمی ، ڈاکٹر ذوالفقار علی رانا، ڈاکٹر خان محمد ساجد ، پروفیسر نسیم شاہد ، شاہدہ شیگی پیرزادہ ، میاں محمد عامر ، ملیحہ فرحت ، انجینئر عبدالحکیم ، صائمہ نورین بخاری ، امجد سعید تھہیم ، صفدر زیدی سمیت لوگوں کی بڑی تعداد شریک ہوئی ۔
فیس بک کمینٹ