ملا ہدہد، کھد بدھ اور ہٹاکٹا جی : شاہد مجید جعفری کی مزاح نوشت

قصہ مشہور ہے کہ دوستوں کی محفل میں کسی نے ملا ہد ہد سے پوچھا سر جی یہ بتائیں کہ صبر جمیل کسے کہتے ہیں؟ ۔ پہلی دفعہ اطلاعاً عرض ہے کہ سوال پوچھنے والے کا نام کالے خان عرف کالو کم عقل تھا ۔ جو کہ پارٹ ٹائم صحافی اور فل ٹائم نان بائی کا کام کرتا تھا۔ دوسری دفعہ بھی اطلاعاً عرض ہے کہ ملا سے پوچھا گیا یہ سوال سو فیصد پلانٹڈ تھا جو کہ ملا کُھد بدھ نے بڑی مشکلوں سے کالو کم عقل کو بتلایا و سمجھایا تھا ۔ ادھر کالو کم عقل کی بات سن کر ملا ہد ہد جو کہ ابھی تازہ تازہ ہی مسماۃ صابرہ سلطانہ کے برادر بزرگ پیر جمیل ہٹے کٹے سے بری طرح سے مار کھا کے آئے تھے بوجہ شرمندگی چپ رہے۔ انہیں خاموش دیکھ کر ملا کُھد بدھ جھٹ سے بولے۔ صابرہ کے بھائی پیر جمیل (ہٹے کٹے) سے اچھی خاصی کٹ کھا نے کے بعد ، ذرا سی بھی آہ و بکا نہ کرنا صبرِ جمیل کہلاتا ہے۔
ادھر ملا کُھد بدھ کا طنز سن کر ہد ہد صاحب بے چین ہوئے، پہلو بدلا۔ کن اکھیوں سے ادھر ادھر دیکھا اور پھر محفل سے یوں اٹھے ، جیسے کوئی جہاں سے اٹھتا ہے۔ ہدہد صاحب کو یوں جاتے دیکھ کر ملا کُھد بدھ زیر (باریک) مونچھ مسکرائے ، پھر فاتحانہ نظروں سے حاضرین مجلس کی طرف دیکھا اور دل ہی دل میں یہ کہتے ہوئے اٹھ کھڑے ہوئے کہ ساڈے نال پنگا ، ناٹ چنگا۔ اس نازک موڑ پہ ملا کھدبد کے بارے میں یہ بتانا ضروری ہے کہ آپ ملا ہدہد کے پیر بھائی ہونے کے ساتھ ساتھ(بسلسلہ عشق مسماۃ صابرہ سلطانہ) ان کے رقیب بھی تھے تیسری دفعہ بھی اطلاعاً عرض ہے کہ چونکہ رنگت میں دونوں ہی قدرتی سیاہ بلکہ کالے سیاہ تھے اس لیے یار دوست انہیں بلا خوف و خطر ایک دوسرے کے رقیب رو سیاہ کہا کرتے تھے۔ دونوں ایک ساتھ ہی پیر ہٹے کٹے کی ہمشیرہذ مسما ۃ صابرہ سلطانہ پہ فریفتہ تھے ۔( جسے ہٹا کٹا صاحب جانے کیوں ہمشیرہ کی بجائے ہمیشہ ہی دختر نیک اختر کہا کرتے تھے) ۔جہاں تک ملا کھد بدھ کے کام دھندے کا تعلق ہے تو آپ کام کم اور چغلیاں زیادہ لگایا کرتے تھے۔ ان کو ہر وقت اس بات کی کھد بدھ لگی رہتی تھی کہ اس وقت کون کیا کر رہا ہے ؟
مندرجہ بالا غم ناک واقعہ(کہ جس میں ملاہد ہد کی ناک سے خون نکلا اور پتلون پاٹی تھا) کی حقیقت کچھ یوں بیان کی جاتی ہے کہ دونوں ہی پیر ہٹا کٹا صاحب کی چھوٹی بہن کے بلاتفاق عاشق زار اور دونوں ہی پہلے میں، پہلے میں کے امیدوار بھی تھے۔ ادھر وہ کہنہ مشق خاتون جو خود کو ” پیکر دوشیزگی "کہتے ہوئے ذ را نہ شرماتی تھیں کا مزاج لڑکپن سے عاشقانہ تھا۔ اسی لیے واقفان حال جس میں سیاسی و غیرسیاسی سبھی شامل تھے بہ یک اتفاق انہیں باجی ” ڈانواں ڈول ” کہا کرتے تھے۔ اس کی وجہ یہ تھی کہ مسماۃ کا دل کسی بھی وقت کسی پہ بھی ڈول سکتا تھا ۔ اور سائل چاہےکیسا بھی ہو وہ مائل بہ کرم ہونے میں ذ را بھی وقت نہیں لگاتی تھیں۔اب تک آپ ظاہراً تین شادیاں اور تین ہی طلاقیں لے چکیں تھیں (جبکہ خفیہ ملاقات جسے فی زمانہ” ڈیٹ” کہا جاتا ہے کی گنتی تا دم تحریر جاری ہے) ۔ آپ چٹی ان پڑھ ہونے کے باوجود بھی محبت کے کھیل میں کمال مہارت رکھتی تھیں ۔آپ نے اس موضوع پر بے شمار اقوال بھی کہے تھے ان میں سے ایک بطور تبرک پیش کیا جاتا ہے فرماتی ہیں ۔
(دورازے کی ) گھنٹی نہ بجا ماہیا، سیدھا اندر آ ۔کہتے ہیں کہ اس قول زریں نے اس قدر شہرت پکڑی کہ نصیبو لعل نامی ایک مغنیہ نے اس کا پنجابی ترجمہ کروایااور پھر اسے گا کر خوب داد و شہرت سمیٹی ۔ مذکورہ گانے کے پنجابی بول ہیں کنڈی نہ کھڑکا سوہنیا سدھا اندر آ ۔ موصوفہ کے بارے میں یہ بات بھی ہمارےعلم میں لائی گئی ہے کہ بسیار کوشش کے باوجود بھی ان کو ابھی تک سچا پیار نہیں ملا ہے۔ اسی لیے آپ تلاش حق کی خاطر مختلف لوگوں سے خفیہ و کارنر میٹنگز وغیرہ کرتی رہتی تھیں۔ چنانچہ اسی سلسلہ میں آج ان کی ملاقات ملا ہد ہد سے طے تھی۔(جس کا ملا کھد بدھ کو بہت قلق تھا)
ادھر وقت مقررہ سے پانج سو منٹ پہلے ہی ملا ہدہد نے اپنی باریک آنکھوں میں سرمہ لگایا۔کان میں پڑوسی سے مانگا ہوا عطر "الف لیلہ و لیلہ” کا پھوہا رکھا ۔پھر خود کو آئینے میں دیکھ کر شرماتے ہوئے بولے ۔ آج آپ نہیں یا گاہک نہیں۔اس کے بعد ملا نے اپنی جیب سے اکلوتی اٹھنی نکالی اور اپنے پیکر خاکی کا صدقہ کیا ۔ پھر اپنی بلائیں لیتے ہوئے مسماۃ کی طرف چل دیئے۔ افسوس ناک خبر بطور اطلاع دی جاتی ہے کہ اس امر کی مخبری ملا کھدبدھ نے پہلے ہی پیر ہٹا کٹا صاحب کو دے رکھی تھی۔(اسی لیے وہ گھات لگائے ملا کے انتظار میں بیٹھےتھے )۔ دوسری طرف ملا کان پہ ہاتھ رکھے اس فکر میں گھلے چلے جا رہے تھے کہ اگر کہیں خدانخواستہ عطرِ "الف لیلہ و لیلہ” کا پھوہا گر گیا تو وہ پڑوسی کو کیا جواب دیں گے؟ ۔
جائےمقتل پہنچ کر ملا ہدہد بلا خوف و خطر کمرے میں داخل ہوگئے۔ کیونکہ پیکج کے مطابق انہوں نے (مسماۃ کا )دروازہ نہیں کھٹکھٹانا۔۔ بلکہ سیدھا اندر جانا تھا ۔۔چنانچہ جیسے ہی ملا مفاد ذاتی کے تحت کمرے میں داخل ہوئے۔ اپنے سامنے مسماۃ کی بجائے پیر ہٹا کٹا جی کو دیکھ کر دنگ رہ گئے۔پھر خطرہ 440 وولٹ کا ادراک کرتے ہوئے جائے وقوعہ سے فرار ہونے کی کوشش کرنے ہی لگے تھے کہ ہٹا کٹا جی نے انہیں اپنے آہنی ہاتھوں میں دبوچ لیا۔اور دھیرے سے کہنے لگےتیری آواز نہیں نکلنی چاہیئے۔یہ سن کر ملا نے اقرارمیں سر ہلا دیا۔اس کے بعد جو انہوں نے ملا کو مارا تو ہائے مار ڈالا ،مطلب ان کی اچھی خاصی پٹائی کر ڈالی ۔آفرین ہے ملا کی ہمت پر کہ اتنی مار کھا نے کے باوجود بھی آپ نے چوں تک نہیں کی ۔کرتے بھی کیسے کہ اپنے قول کے ہاتھوں مجبور جو تھے (اف اللہ )۔ اچھی خاصی مار کھانے کے بعد ہٹا کٹا جی ملا ہد ہد کوآز اد کرتے ہوئے بولے۔چل اب میری عزت کر، ہٹاکٹا جی کا یہ فرمان سن کر پہلے تو ملا ہکا بکا رہ گئے پھر جلدی سے کورنش بجا لاتے ہی گرتے پڑتے گھر کی طرف چل دیئے۔
تازہ ترین صورت حال یہ ہے کہ ملا کھد بدھ ابھی تک چغل خوری میں مصروف ہے۔ کالو کم عقل جو کہ پارٹ ٹائم صحافی اورفل ٹائم نان بائی کاکام کرتا ہے ہے عوام کے لیے توبرائے نام مگر اپنے لیے دھڑادھڑ نان لگا رہا ہے۔ مسماۃ صابرہ سلطانہ سچے پیار کی تلاش میں دل کا بوہا (دروازہ) کھولے کسی کے انتظار میں بیٹھی ہے۔ پیر ہٹا کٹا صاحب جس کو جی چاہتا ہے دے مار تے ساڑھے چار ۔۔بلکہ بعض اوقات تو پونے پانچ تک بجا دیتا ہے ۔عجیب بات ہے کہ اچھی خاصی مار کٹائی کے بعد ہٹا کٹا ہر مضروب سے یہ تقاضہ بھی ضرور کرتا ہے کہ مجھ سے ڈرو اور میری عزت بھی کرو۔ رہی بات ملاہد ہد کی، تو وہ یہی سوچ سوچ کر ہلکان ہوا جا رہا ہے کہ جائیں تو جائیں کہاں کہ
بنے ہیں اہلِ ہوس، مدعی بھی منصف بھی
کسے وکیل کریں، کس سے منصفی چاہیں؟