ملتان سمیت جنوبی پنجاب میں عاشورہ محرم کے جلوس اپنے روایتی راستوں سے ہوتے ہوئے مقررہ مقامات پر اختتام پذیرہوگئے اورکسی قسم کا کوئی ناخوشگوارواقعہ رونما نہیں ہوا۔ آرپی او ملتان کیپٹن(ر) محمد سہیل چوہدری ،کمشنرملتان محمد عامرخٹک سمیت پولیس اور انتظامیہ کے اعلی حکام نے سکیورٹی کے انتظامات کا جائزہ لیا ۔آرپی او ملتان کے مطابق تمام جلوسوں اور مجالس کی کنٹرول روم میں مانیٹرنگ کی گئی۔
ایس ایس پی آپریشنز ملتان محمد عمران، ایس ایس پی انویسٹی گیشن رانا محمد اشرف، ایس پی کینٹ ڈویژن کیپٹن(ر) قاضی علی رضا، ایس پی سٹی ڈویژن حسن رضا کھاکھی اور ایس پی گلگشت بابر جاوید نے اپنے اپنے علاقوں میں جلوسوں اور مجالس عزاءکی حفاظت کویقینی بنایا۔ ملتان کینٹ ،صدربازار، لال کرتی، چوک بازار، حسین آگاہی، ممتاز آباد، سورج میانی سمیت تمام علاقوں میںلوگوں کو واک تھروگیٹس کے ذریعے جلوسوں اورمجالس کی حدود میں داخلے کی اجازت دی گئی۔
دس محرم الحرام کے حوالے سے ضلع بھر میں 116ماتمی جلوس برآمد ہوئے جبکہ 130مجالس عزاءکاانعقاد کیاگیا۔ ان کی فول پروف سکیورٹی کے لیے 4300سے زیادہ افسران اورجوانوں نے ڈیوٹی دی۔ شہر کے اہم مقامات پر ایلیٹ فورس کی 12ٹیمیں ،ڈولفن فورس ،محافظ سکواڈ اور پولیس کے چاق وچوبند دستے گشت کرتے رہے۔ تمام مقامات پر ڈرون کیمروں اورسی سی ٹی وی کے ذریعے مانیٹرنگ کی گئی۔
آرپی او ملتان کیپٹن(ر)محمد سہیل چوہدری اورسی پی اوملتان منصور الحق رانا نے کمشنرملتان عامرخٹک کے ہمراہ چوک گھنٹہ گھر کا دورہ کیا۔ اس کے علاوہ بارش کے باوجود انتظامیہ اور پولیس کے افسران حرم گیٹ چوک میں تعزیوں کی صف بندی کے موقع پر موجودرہے۔جلوسوں کے اختتام پر مختلف امام بارگاہوں میں مجالس شام غریباں منعقد ہوں گی جن سے نامور ذاکرین کرام خطاب کریں گے۔
فیس بک کمینٹ