صدر آصف زرداری کی طبیعت میں بہتری ، دبئی منتقلی کی خبریں درست نہیں، شرجیل میمن

کراچی : صدر مملکت آصف علی زرداری کو بخار اور انفیکشن کے باعث گزشتہ شب کراچی کے ہسپتال میں داخل کرایا گیا تھا تاہم اب ان کی طبیعت بہتر ہے ۔ڈان نیوز کے مطابق ہسپتال ذرائع کا کہنا ہے کہ صدر آصف علی زرداری کا کراچی کے نجی ہسپتال میں علاج جاری ہے اور وہ بخار اور انفیکشن میں مبتلا ہیں۔
دوسری جانب سماجی رابطے کی ویب سائٹ ’ایکس‘ پر جاری پیغام میں وزیر اطلاعات سندھ شرجیل میمن نے صدر مملکت کو دبئی منتقل کرنے کی خبروں کی تردید کرتے ہوئے کہا کہ ’صدر مملکت آصف علی زرداری کی طبیعت بہتر ہو رہی ہے، ان شااللہ وہ جلد ہی مکمل صحتیاب ہوں گے۔‘
صدر مملکت انفیکشن اور بخار میں مبتلا ہونے کے باعث زرداری ہاؤس نوابشاہ میں پارٹی کارکنوں اور رہنماؤں عید بھی نہیں مل سکے تھے۔
69 سال کی عمر میں، صدر کو حالیہ برسوں میں متعدد صحت کے مسائل کا سامنا رہا ہے۔ صدر آصف علی زرداری اکتوبر 2024 میں ہوائی جہاز سے اترتے ہوئے پاؤں میں فریکچر کروا بیٹھے تھے۔ گرنے کے بعد انہیں فوری طور پر علاج کے لیے ہسپتال لے جایا گیا تھا، جہاں چیک اپ کے بعد ڈاکٹر نے ان کے پاؤں پر پلاسٹر چڑھایا۔ مارچ 2023 میں، انہوں نے متحدہ عرب امارات میں آنکھوں کی سرجری کروائی۔
2022 میں، انہیں سینے کے انفیکشن کے علاج کے لیے کراچی کے ڈاکٹر ضیاء الدین ہسپتال میں ایک ہفتے کے لیے داخل کرایا گیا تھا۔ خراب صحت کی افواہوں کے درمیان، ان کے ذاتی معالج اور قریبی معاون ڈاکٹر عاصم نے سوشل میڈیا پلیٹ فارم ایکس پر تصدیق کی کہ ان کی صحت اچھی ہے۔ صدر آصف علی زرداری کے بیٹے اور پی پی پی کے چیئرمین بلاول بھٹو زرداری کے مطابق، جولائی 2022 میں ان کا کووڈ-19 ٹیسٹ مثبت آیا تھا لیکن انہیں صرف ’ ہلکی علامات’ ظاہر ہوئی تھیں۔اس سے ایک سال قبل، صدر زرداری کو اپنی بار بار کی سفری مصروفیات کی وجہ سے ’ محنت اور تھکن’ کی وجہ سے کراچی کے ایک نجی ہسپتال میں داخل کرایا گیا تھا۔
( بشکریہ : ڈان نیوز )