تاخیر ہو سکتی ہے لیکن الیکشن تو ہوں گے : بلاول بھٹو زرداری

ملتان : پاکستان پیپلز پارٹی کے چیئرمین بلاول بھٹو زرداری نے کہا ہے الیکشن میں تاخیر ہوسکتی ہے لیکن الیکشن تو ہونے ہی ہیں آپ الیکشن سے بھاگ نہیں سکتے، الیکشن میں جیت پیپلز پارٹی کی ہوگی۔
منگل کی شام سیداں والا بائی پاس پر کارکنوں سے خطاب کرتے ہوئے بلاول بھٹو زرداری نے کہا کہ محترمہ بے نظیر بھٹو کو انتخابی مہم کے دوران شہید کیا گیا۔ علی حیدر گیلانی کو الیکشن سے ایک روز قبل اغواء کیا گیا لیکن پھر بھی ہم الیکشن سے نہیں بھاگے ہم نے پھر بھی الیکشن لڑا۔ انہوں نے مزید کہا کہ الیکشن میں تاخیر تو ہوسکتی ہے لیکن الیکشن تو ہوگا بلاول بھٹو نے کہا کہ ملتان شہر نے ہمیشہ پیپلز پارٹی کا ساتھ دیا ہمیں کبھی مایوس نہیں کیا۔ چیئرمین پیپلز پارٹی کا کہنا تھا کہ ہم نے جمہوری طریقے سے چیئرمین پی ٹی آئی کی حکومت کو ختم کیا اور پیپلز پارٹی نے ملتان کے ضمنی الیکشن میں تاریخی فتح حاصل کی ۔ ملتان کے عوام اس وقت بھی نہ ڈرے نہ جھکے نہ پیچھے ہٹے ، انہوں نے کہا کہ پاکستان پیپلز پارٹی نے ملتان کا تاریخی ضمنی الیکشن جیتا۔ پورے پاکستان میں ہمارا موسی گیلانی ہی ضمنی الیکشن جیت پایا تھا ۔
آج بھی مجھے یاد ہے جب کٹھ پتلی کے خلاف مہم چلا رہے تھے تو ملتان کی عوام نے میرا بھرپور ساتھ دیا تھا ، ہم ملک دشمن پارٹی کو ملتان سمیت پورے ملک سے شکست دیں گے ۔