کراچی :پاکستان میں گذشتہ 24 گھنٹوں کے دوران کورونا وائرس کے 190 نئے کیسز سامنے آئے ہیں۔ اس وقت ملک میں کورونا وائرس کے متاثرین کی کل تعداد 4 ہزار 975 ہو گئی ہے جبکہ اس وائرس سے ملک میں اب تک 77 افراد ہلاک ہو چکے ہیں۔
ہفتہ کے روز نیشنل کمانڈ اینڈ کنٹرول سینٹر سے جاری اعداد و شمار کے مطابق ملک میں کورونا کے اب تک 4 ہزار 892 مصدقہ کیسز سامنے آئے ہیں جبکہ صحت یاب ہونے والوں کی تعداد 762 ہے۔
صوبہ سندھ میں کورونا کے ایک ہزار 318 کیسز سامنے آئے ہیں جب کہ 358 افراد صحت یاب ہوئے ہیں۔ صوبے میں اب تک 28 افراد کے ہلاک ہونے کی تصدیق کی گئی ہے اور یہ تعداد دوسرے کسی بھی صوبے سے زیادہ ہے۔
ہفتہ کو کراچی کے ضلع شرقی کے کئی علاقوں میں کورونا وائرس کے متاثرہ مریضوں میں تشویش ناک حد تک اضافے کے بعد ڈپٹی کمشنر ضلع شرقی نے متاثرہ علاقے مکمل سیل کرنے کے احکامات جاری کردیے جس کے تحت 11 یوسیز کو سیل کر دیا گیا۔
ان میں یو سی 6 گیلانی ریلوے، یو سی 7 ڈالمیا، یو سی 8 جمالی کالونی، یو سی 9 گلشن اقبال 2، یو سی 10 پہلوان گوٹھ، یو سی 12 گلزار ہجری، یو سی 13 صفورہ، یو سی 14 فیصل کینٹ، یو سی 2 منظور کالونی، یو سی 9 جیکب لائن اور یو سی 10 جمشید کوارٹرز شامل ہیں۔
وزیر اعلیٰ سندھ مراد علی شاہ کا کہنا ہے کہ ‘گذشتہ 24 گھنٹوں میں 531 ٹیسٹ کیے گئے جن میں سے 104 مثبت آئے ہیں۔ یہ دنیا کی سب سے زیادہ اوسط ہے جو کہ ہمارے لیے تشویش کا باعث ہے۔’
کراچی ضلع شرقی کے چئیرمن معید انور کا کہنا ہے کہ ‘جن علاقوں کو سیل کیا گیا ہے وہاں ڈیڑھ سے دو سو ایسے گھر ہیں جہاں ایک سے زائد کورونا وائرس کے مریض ہیں۔’
‘ان کا کہنا تھا کہ اسی مقصد کے لیے ان علاقوں کو سیل کرنے کا فیصلہ کیا گیا۔ جن گھروں کی نشاندہی کی گئی ہے ان کے ارد گرد رہائش پذیر افراد کا بھی ٹیسٹ کیا جائے گا، ساتھ ہی ان علاقوں میں جراثیم کش سپرے بھی کریں گے۔’
ترجمان پرائمری اینڈ سیکنڈری ہیلتھ کیئر ڈیپارٹمنٹ پنجاب کے مطابق صوبے میں کورونا وائرس کے مزید 74 کیسز کی تصدیق ہوئی ہے اور مجوعی تعداد 2 ہزار 410 ہو گئی ہے۔
رائے ونڈ مرکز سمیت تبلیغی ارکان کی تفصیلرائے ونڈ مرکز میں 462، شیخوپورہ 8، منڈی بہاالدین میں 13، سرگودھا 35، میانوالی 7، وہاڑی 25، راولپنڈی میں 6 اور جہلم میں 35 تبلیغی افراد میں کورونا کی علامات پائی گئی ہیں۔
‘ننکانہ 2، گجرات 10، گوجرانوالہ 2، رحیم یار خان 4، بھکر 47، خوشاب 2، راجن پور 1، حافظ آباد 35، سیالکوٹ 19، لیہ 16، ناروال 3، بہاولنگر 9، فیصل آباد میں 6 تبلیغی ارکان میں کورونا کی تصدیق ہوئی ہے۔’
نیشنل کمانڈ اینڈ کنٹرول سینٹر کے مطابق خیبر پختونخوا میں کورونا کے 656 مریضوں کی تصدیق ہوئی ہے۔ صوبے میں 25 ہلاکتیں ہوئی ہیں جبکہ 131 مریضوں کے صحت یاب ہونے کی تصدیق کی گئی ہے۔
بلوچستان میں کورونا وائرس کے 220 مریض سامنے آئے ہیں جبکہ صوبے میں وائرس سے صرف ایک ہلاکت ک ہوئی جبکہ صحت یاب ہونے والے افراد کی تعداد 95 ہے۔
گلگت بلتستان میں 215 افراد کے کورونا وائرس میں مبتلا ہونے کی تصدیق کی گئی ہے جبکہ علاقے میں 125 افراد صحت یاب اور تین افراد ہلاک ہوئے ہیں۔
وفاقی دارالحکومت اسلام آباد میں کورونا وائرس کے مریضوں کی تعداد 113 ہے جن میں سے 13 افراد صحت یاب ہوئے جبکہ ایک ہلاکت ہوئی ہے۔
بلوچستان میں صوبائی حکومت نے کوئٹہ میں کورونا وائرس ٹیسٹ سیمپلنگ کا فیصلہ کیا ہے جس کے تحت شہر میں وارڈز کی بنیاد پر بلاترتیب ٹیسٹ کیے جائیں گے۔ ٹیسٹنگ کا ڈیٹا تیار کر کے کورونا وائرس کے پھیلاؤ کے رجحان کا جائزہ لیا جائے گا۔
ٹیسٹ سیمپلنگ کے لیے صوبائی حکومت نے ملکی سطح پر تیار کی جانے والی وی ٹی ایم ٹیسٹنگ کٹس خریدنے کی منظوری دے دی گئی ہے۔ ٹیسٹ سیمپلنگ کے طریقہ کار کی تیاری کا ٹاسک ڈپٹی کمشنر کوئٹہ اور وزیراعلیٰ ڈیلیوری یونٹ کو دے دیا گیا ہے۔
خبر رساں ادارے اے ایف پی کے مطابق دنیا میں کورونا کے مصدقہ متاثرین کی تعداد 17 لاکھ کے لگ بھگ ہے جبکہ جان ہاپکنز یونیورسٹی کے مطابق امریکہ میں متاثرین کی تعداد پانچ لاکھ سے تجاور کر گئی ہے۔
کورونا وائرس کے پھیلاؤ کو روکنے کے لیے دنیا کے بڑے شہروں میں لاک ڈاؤن ہے۔ معروف اور تاریخی شہروں سے لے کر مصروف ترین سڑکوں اور چوراہوں میں ویرانی چھائی ہوئی ہے۔
( بشکریہ : اردو نیوز )
فیس بک کمینٹ